Міжнародная спартакіяда па інваспорце «Залаты леў» стартуе ў Магілёве 1 ліпеня

Адкрытая гарадская спартакіяда інвалідаў-калясачнікаў «Залаты леў» збярэ ў Магілёве 1–4 ліпеня больш за 60 удзельнікаў. На спаборніцтвы прыедуць спартсмены-аматары з Беларусі, Расіі і Украіны, расказаў старшыня Магілёўскай арганізацыі рэабілітацыі і спорту інвалідаў-калясачнікаў Алег Юркоў.

«У праграму спаборніцтваў увойдуць: дартс, армрэстлінг, стральба з пнеўматычнай вінтоўкі ў становішчы седзячы, – адзначыў суразмоўца. – Акрамя таго, удзельнікі паспаборнічаюць у спартыўных гульнях–корнхоле, бочэ, новусе і жульбаку. З многімі з гэтых гульняў я пазнаёміўся 10 гадоў таму на спаборніцтвах у Маскве і вырашыў развіваць гэтыя кірункі ў Магілёве».

Пераможцаў «Залатога льва» ўзнагародзяць кубкамі, медалямі і дыпломамі. Акрамя таго, удзельнікі атрымаюць сувеніры і кнігі пра Магілёў. Апошні дзень спаборніцтваў будзе прысвечаны культурнай праграме-экскурсіі па абласным цэнтры і наведванню месцаў баявой славы, у тым ліку мемарыяльнага комплексу «Буйніцкае поле».

«Падчас такіх спаборніцтваў мы не толькі змагаемся за перамогу, але і праводзім час са сваімі сябрамі з суседніх краін, абменьваемся думкамі аб развіцці інваспорту, падтрымліваем адзін аднаго, – сказаў на заканчэнне Алег Юркоў. – Менавіта таму да нашай адкрытай гарадской спартакіяды з кожным годам далучаецца ўсё больш людзей».

Спаборніцтвы праводзяцца сямнаццатым разам і прымеркаваны да Дня горада Магілёва і Дня Незалежнасці. Сёлета яны адбудуцца на базе магілёўскага Лядовага палаца. Арганізатарамі спартакіяды выступілі Магілёўская арганізацыя рэабілітацыі і спорту інвалідаў-калясачнікаў, упраўленне спорту і турызму Магілёўскага аблвыканкама, аддзел спорту і турызму гарвыканкама і гарадскі фізкультурна-спартыўны клуб.

БЕЛТА