Мочаныя яблыкі, марынаваны часнок і карэйская морква: у Кіраўскім райст робяць саленні на зіму

Квасільна-засолачны ўчастак Бабруйскага адасобленага структурнага падраздзялення Кіраўскага райста нарыхтоўвае каля 200 т засолачнай прадукцыі ў год і цалкам закрывае патрэбу ў ёй усяго рэгіёна. Пра гэта паведаміў намеснік старшыні праўлення па нарыхтоўках і прамысловасці Кіраўскага раённага спажывецкага таварыства Мікалай Ермакоў.

На квасільна-засолачным участку сёлета плануюць нарыхтаваць каля 20 т мочаных яблыкаў гатункаў «Антонаўка» і «Імрус». Гэты від прадукцыі рэалізуецца ў гандлёвай сетцы спажывецкай кааперацыі Магілёўскай вобласці. Напрыклад, у мінулым годзе было прададзена каля 16 т прадукцыі. Актыўна купляюць мочаныя яблыкі для рознічнага гандлю індывідуальныя прадпрымальнікі, таксама садавіна карыстаецца папулярнасцю ў пакупнікоў на сельскагаспадарчых кірмашах.

Квашанай капусты ў гэтым годзе нарыхтуюць не менш за леташні ўзровень – каля 60 т. Яе робяць па традыцыйным старадаўнім рэцэпце без дабавак і кансервантаў – натуральны прадукт. Для пачатку капусту здрабняюць, затым мнуць і ставяць пад прэс: 4-5 дзён – і атрымліваецца хрумсткая і духмяная страва, попыт на якую год ад году не зніжаецца. Яшчэ адно любімае многімі салёнае – бачкавыя агуркі, якіх у гэтым годзе нарыхтуюць не менш за 70 г. Плануецца, што больш за палова гэтага аб’ёму пойдзе на расійскі рынак. Так, у мінулым годзе на экспарт прададзена амаль 43 г.

На квасільна-засолачным участку ўжо нарыхтавалі 12 т таматаў і 1 т марынаванага часнаку, аб’ём якога ў параўнанні з мінулым годам павялічаны ў два разы. Акрамя традыцыйных прадуктаў квашання і засолкі, у гэтым годзе зрабілі пробныя партыі морквы па-карэйску і пікантных буракоў. У райст упэўнены, што гэта прадукцыя будзе запатрабавана на спажывецкім рынку.

Кааператары выкарыстоўваюць для сваёй прадукцыі розную тару – ад 500 мл да 5 л. У параўнанні з мінулым годам цэны на саленні засталіся практычна на тым жа ўзроўні – трохі падраслі ў кошце толькі салёныя агуркі.

БЕЛТА