RU BY EN 中文
Twitter Instagram
Герб Республики Беларусь
МАГІЛЁЎСКІ АБЛАСНЫ ВЫКАНАЎЧЫ КАМІТЭТ АФІЦЫЙНЫ ПАРТАЛ
Герб Могилевской области

Музей Вялікай Айчыннай вайны адкрыўся ў галоўным статыстычным упраўленні Магілёўскай вобласці

22.08.202315:42

Дзесяткі гераічных біяграфій, унікальныя лёсы былых работнікаў органаў дзяржаўнай статыстыкі... Амаль паўтара гады працы з архівамі, якую правялі супрацоўнікі галоўнага статыстычнага ўпраўлення Магілёўскай вобласці, выліліся ў маштабны праект. Напярэдадні прафесійнага свята - Дня работнікаў дзяржаўнай статыстыкі, у Магілёве адкрыўся музей Вялікай Айчыннай вайны. Ён складаецца з чатырох раздзелаў. Адзін з іх прысвечаны статыстыцы ў даваенны, ваенны і пасляваенны час, другі - кіраўніцтву, якое вярнулася з вайны з узнагародамі, яшчэ два - ветэранам і партызанам.

Стварэнне музея Вялікай Айчыннай вайны - гэта вынік пошукава-даследчай работы ўсяго калектыву галоўнага статыстычнага ўпраўлення Магілёўскай вобласці на працягу 2022-2023 гадоў. Яго начальнік Алена Марозава адзначыла, што спачатку матэрыялы збіраліся для Кнігі Памяці:

- Працу пачалі ў Год гістарычнай памяці. Звесткі пра нашых гераічных супрацоўнікаў запытвалі ў Нацыянальным статыстычным камітэце, Дзяржаўным архіве грамадскіх аб'яднанняў Магілёўскай вобласці, у афіцыйных крыніцах: інфармацыйнай сістэме «Памяць народа», «Партызаны Беларусі», сямейных архівах сваякоў. Інфармацыі аказалася вельмі шмат: нам удалося адшукаць звесткі пра больш чым 150 нашых супрацоўнікаў, якія працавалі ў статыстыцы з 1945 года. Таму вырашылі не абмяжоўвацца толькі кнігай, а зрабіць сапраўдны музей. У ім літаратура, статыстычныя выкладкі даваеннага і ваеннага часу, дакументы, фатаграфіі, біяграфіі людзей, якія ваявалі за нашу Перамогу.

Алена Анатольеўна звяртае ўвагу на персаналіі. Напрыклад Аляксандр Антановіч Стрыханаў прапрацаваў у Бялыніцкім аддзеле статыстыкі амаль 40 гадоў. У час вайны быў камандзірам батарэі 49 асобнага мінамётнага дывізіёна.
 
- Нават быўшы параненым у баі ён заставаўся ў страі і кіраваў дзеяннямі сваёй батарэі. Ён прайшоў усю вайну, сумленна працаваў у мірны час. І такіх гераічных біяграфій шмат: нехта браў удзел у партызанскім руху, у буйных бітвах. Гэта наша памяць, і мы мусім яе берагчы. Для сябе адкрылі шмат новай інфармацыі, у тым ліку статыстычнай. Так, камусьці можа падацца, што гэта сухія лічбы. Але за імі крыецца каштоўная інфармацыя, якая паказвае, як развівалася народная гаспадарка, іншыя сферы жыцця. У нас нават захаваўся першы статыстычны зборнік, яшчэ даваенны, дзе можна вывучыць гісторыю ў лічбах, - адзначае начальнік галоўнага статыстычнага ўпраўлення Магілёўскай вобласці.
 
Самы каштоўны экспанат музея - Кніга Памяці. У ёй сабраны фатаграфіі і іншыя звесткі аб удзельніках і ветэранах Вялікай Айчыннай вайны, былых супрацоўніках органаў дзяржаўнай статыстыкі Магілёўскай вобласці. Кожная старонка ўнікальная - аформлена на фоне аўтабіяграфіі кожнага ўдзельніка вайны. Кнігу выдалі за кошт сродкаў саміх працаўнікоў статупраўлення і раённых аддзелаў.

У музеі адлюстравана і гісторыя галоўнага статыстычнага ўпраўлення Магілёўскай вобласці. У 1941 годзе дзейнасць упраўленняў народнагаспадарчага ўліку БССР была часова прыпынена. А ў 1943 годзе ў сувязі з пачаткам функцыянавання органаў статыстыкі зноў пачалі фармавацца штаты супрацоўнікаў. Па меры паступовага вызвалення раёнаў ад фашысцкіх захопнікаў перад статыстыкай паўставалі новыя задачы: хутчэй улічыць колькасць насельніцтва, вытворчае абсталяванне, жылы фонд, культурныя каштоўнасці, а таксама вызначыць памеры нанесенага ворагам урону. Усё гэта было зроблена за кароткі час.
 
Плануецца, што музей будуць наведваць самі супрацоўнікі Галоўнага статыстычнага ўпраўлення, раённыя аддзелы статыстыкі, моладзь, школьнікі. Акрамя гэтага, звесткі аб былых работніках, якія ляглі ў аснову Кнігі Памяці, будуць апублікаваны на старонцы музея ў сацыяльных сетках.

СБ

Пры выкарыстанні матэрыялаў актыўная гіперспасылка на mogilev-region.gov.by абавязковая