На Буйніцкім полі адбыўся абласны этап акцыі «На славу агульнай перамогі!»

На Буйніцкім полі сёння адбыўся абласны этап акцыі «На славу агульнай перамогі!». Тут сабраліся прадстаўнікі выканаўчай улады, грамадскіх арганізацый, дэпутаты, вайскоўцы, духавенства, моладзь з усіх раёнаў, Магілёва і Бабруйска. У якасці ганаровых гасцей прысутнічалі намеснік старшыні Магілёўскага аблвыканкама Валерый Малашка, намеснік старшыні абласнога Савета дэпутатаў Ірына Раінчык, ваенны камісар ваеннага камісарыята Магілёўскай вобласці палкоўнік Аляксандр Гарошкін, старшыня Савета ветэранаў Магілёўскай вобласці Анатоль Глаз, архіепіскап Магілёўскі і Мсціслаўскі ўладыка Сафроній, настаяцель Храма-помніка ў гонар Усіх Святых і ў памяць аб ахвярах, якія выратаванню Айчыны нашай паслужылі, Фёдар Поўны.

Адкрыла мерапрыемства памінальная літыя па загінулых воінах у храме ў гонар Раства Іаана Прадцечы. Ён быў пабудаваны ў памяць пра тых, хто гераічна абараняў Магілёў у 1941 годзе: тады 23 дні гараджане і салдаты Чырвонай Арміі абаранялі горад. Храм адкрыўся для вернікаў у снежні 2019 года, дапоўніўшы мемарыяльны комплекс «Буйніцкае поле» – сімвал незвычайнай мужнасці і ахвярнасці ў імя Вялікай Перамогі – важным духоўным збудаваннем. З гэтага часу кожны магілёвец і ўсе, хто прыязджае, агледзеўшы музей пад адкрытым небам, могуць памаліцца аб супакаенні загінулых воінаў, паставіць свечку ў гонар тых, хто аддаў жыццё за веру, Айчыну і народ.

Пасля набажэнства ўсе ўдзельнікі літыі прайшлі да мемарыяльнага комплексу, дзе ля капліцы ўсклалі кветкі і ўшанавалі хвілінай маўчання памяць загінулых у баях.

Абласное мерапрыемства на Буйніцкім полі падагульніла раённыя і гарадскія акцыі, якія напярэдадні прайшлі ва ўсіх кутках рэгіёна. Як і было запланавана, з памятных месцаў, воінскіх пахаванняў, дзе спачываюць загінулыя ў баях з нямецка-фашысцкімі захопнікамі абаронцы і мірныя жыхары, сабраны сімвалічныя жмені зямлі. 23 капсулы сёння перададзены ў Мінск. Да кожнай прыкладаецца спіс імёнаў загінулых, а таксама інфармацыя аб мясцовасці і людзях, якія ўнеслі ўклад у Перамогу. Плануецца, што ўрачыстая цырымонія закладкі капсул у крыпту Храма-помніка ў гонар Усіх Святых адбудзецца ў дзень 75-годдзя Вялікай Перамогі.

«Пройдуць яшчэ гады, зменіцца ні адно пакаленне, але ў сэрцах жыхароў Прыдняпроўскага краю захаваецца памяць аб подзвігу нашых прадзедаў, дзядоў і бацькоў, – адзначыў падчас мерапрыемства Валерый Малашка. – Наша агульная перамога застанецца сімвалам гонару за іх – тых, хто ў самай цяжкай, жорсткай і кровапралітнай вайне абараніў свабоду і незалежнасць Радзімы».

Акцыя «На славу агульнай Перамогі!» стварае новую культуру памяці аб Вялікай Айчыннай вайне, абараняе гістарычную праўду, як падкрэсліў намеснік старшыні аблвыканкама. «Вельмі важна, каб людзі памяталі, што такое нацызм, каб ніколі не ўзнікала ў нашых дзяцей і ўнукаў жадання вырашаць праблемы вайной, а маладое пакаленне ведала: дружба народаў магчымая на практыцы, а не толькі ў тэорыі», – сказаў Валерый Малашка.

Ён звярнуў увагу, што 9 мая ў крыпце Храма-помніка ў гонар Усіх Святых будуць яднацца ў народнай памяці ўсе, хто змагаўся плячом да пляча, здабываў агульную для ўсіх перамогу ў вайне. «Быць нашчадкамі Перамогі – не толькі высокі гонар, але і адказнасць за незалежнасць краіны, за бясхмарную і светлую будучыню нашчадкаў. Мы аддаём даніну павагі тым, хто сёння ўмацоўвае краіну мірнай стваральнай працай, уносіць свой уклад у развіццё эканомікі і сацыяльнай сферы, рост дабрабыту нашых грамадзян і павышэнне прэстыжу Беларусі ў свеце», – падсумаваў Валерый Малашка.

На тэрыторыі Магілёўскай вобласці налічваецца 1508 воінскіх пахаванняў часоў Вялікай Айчыннай вайны, дзе спачывае 327 578 чалавек.

Міжнародная акцыя памяці «На славу агульнай Перамогі!» праводзіцца ў межах святкавання 75-годдзя Перамогі савецкага народа ў Вялікай Айчыннай вайне. Яе мэты – грамадзянска-патрыятычнае і маральнае выхаванне падрастаючага пакалення, далучэнне да культуры памяці, фарміраванне ў яго разумення асноў сучаснай дзяржаўнасці. Акцыя служыць захаванню гістарычнай памяці аб Вялікай Айчыннай вайне і ўвекавечанні імёнаў яе ўдзельнікаў.