На Чыгірынскім вадасховішчы абмяжуюць рыбалку з 20 верасня па 10 кастрычніка

У мэтах аховы рыбных рэсурсаў з 20 верасня па 10 кастрычніка на Чыгірынскім вадасховішчы Быхаўскага раёна будзе абмежавана аматарскае рыбалоўства, паведаміла спецыяліст па сувязях з грамадскасцю Дзяржаўнай інспекцыі аховы жывёльнага і расліннага свету пры Прэзідэнце Вольга Грамовіч.

З 20 верасня РУП «Магілёўэнерга» правядзе рамонтныя работы падводнай часткі гідратэхнічнага збудавання Чыгірынскай гідраэлектрастанцыі. Пры гэтым часткова спусцяць Чыгірынскае вадасховішча. Яго ўзровень знізіцца на 0,5 м.

«Уводзіцца забарона на выкарыстанне маламерных суднаў, у тым ліку і ў іншых мэтах, акрамя рыбалоўства. Таксама нельга будзе рыбачыць спінінгам. Увесь гэты час тэрыторыя вакол Чыгірынскага вадасховішча будзе знаходзіцца пад узмоцненай аховай дзяржінспектараў і грамадскіх актывістаў», – адзначыла Вольга Грамовіч.

Акрамя таго, спецыяльная каманда будзе сачыць, каб рыба не заставалася ў дробных, ізаляваных ад асноўнага вадаёма лужынах, якія могуць ўтварыцца пры спуску вады. Такую рыбу «эвакуююць» назад у вадасховішча. Пасля заканчэння работ прадугледжана зарыбленне вадаёма.

БЕЛТА