На Магілёўшчыне сфарміраваныя ўчастковыя камісіі па рэферэндуме

У Магілёўскай вобласці завершана фарміраванне ўчастковых камісій для галасавання па рэферэндуме. У адпаведнасці са створанымі раней 707 участкамі для галасавання, у тым ліку 32 у бальніцах, санаторыях, прафілакторыях, дамах адпачынку і іншых установах, якія аказваюць медыцынскія паслугі, столькі ж утворана і дадзеных камісій. Іх колькасны склад перавышае 7,5 тыс. чалавек.

Пры фарміраванні гэтага першаснага і неабходнага звяна галасавання па рэспубліканскім рэферэндуме, як падкрэсліў старшыня абласной камісіі па рэферэндуме Валерый Берастаў, цалкам вытрыманы нормы Выбарчага кодэкса Рэспублікі Беларусь.

Да прыкладу, катэгорыя дзяржаўных служачых павінна складаць у іх не больш за адну трэць ад агульнай колькасці іх членаў. У складзе ж участковых камісій вобласці па рэферэндуме іх 4,5 працэнта.

Прадстаўнікі грамадскіх аб’яднанняў і палітычных партый павінны займаць не менш за адну трэць іх колькасці. Гэта ж катэгорыя ў складзе ўчастковых камісій Прыдняпроўскага рэгіёна налічвае каля 50%. Большасць у ёй належыць членам Федэрацыі прафсаюзаў Беларусі (больш за 14%), аб’яднання «Белая Русь» (7,4%), моладзевай, ветэранскай, жаночай і іншых грамадскіх арганізацый Рэспублікі.

Больш за тры чвэрці складу ўчастковых камісій – жанчыны. Больш за 6% – моладзь.

mogilevnews.by