На пасадзе намесніка старшыні Магілёўскага аблвыканкама зацверджаны Алег Стэльмашок

Старшыня Магілёўскага аблвыканкама Анатоль Ісачанка прадставіў сёння калектыву новага намесніка старшыні аблвыканкама Алега Стэльмашка. Днём раней Прэзідэнт Беларусі Аляксандр Лукашэнка даў згоду на яго назначэнне.

Анатоль Ісачанка адзначыў, што ў рэгіёне гэта чалавек не новы, яму трэба будзе курыраваць работу сацыяльнай сферы рэгіёну: «Уся працоўная дзейнасць Алега Уладзіміравіча звязана з Магілёўскай вобласцю. Большасць з вас яго добра ведае, - падкрэсліў губернатар. - Працы трэба будзе вельмі шмат. Тыя пытанні, якія стаяць перад вобласцю, перад абласным выканаўчым камітэтам, абласным Саветам дэпутатаў, у той ці іншай меры, напрамую будуць датычыцца і Вас. Усё роўна, будзе гэта пасяўная, уборачная, будоўля - мы павінны працаваць як адзінае цэлае. Зразумела, што ў кожнага ёсць свой кірунак, але падзяляцца пры гэтым нельга. А сёння, з прычыны абставін, якія склаліся ў свеце, вакол нашай краіны, інфармацыйны ідэалагічны парадак дня выходзіць на першы план. І нам неабходна ў гэтым напрамку актыўна працаваць. Робіцца дастаткова, а паказаць атрымліваецца не заўсёды. Я не кажу, што гэта павінна быць выхваленне, але тое, што робіцца - трэба паказваць. Калі ёсць праблемы, значыць, паказваць праблемы. Але гэта павінна быць канструктыўна і зразумела».

Кіраўнік рэгіёну ўручыў службовае пасведчанне і павіншаваў свайго новага намесніка з уступленнем на пасаду, пажадаўшы плённай працы на карысць Прыдняпроўскага краю.

«У вобласці створана і паспяхова функцыянуе сістэма працы ўсіх структурных падраздзяленняў, у тым ліку і сацыяльнай сферы. Забяспечана ўзаемадзеянне на ўзроўні вертыкалі ўлады - гэта і выканаўчая, і прадстаўнічая ўлада, якая бачыць перад сабой выразныя мэты, разумее, якія задачы яны вырашаюць і які вынік маюць намер атрымаць. Што, у прынцыпе, пацвярджаецца шэрагам дасягненняў як асобных прадпрыемстваў, так і людзей, якія працуюць на іх. Ёсць чым ганарыцца, ёсць на што абаперціся, створаны добры падмурак, - падзяліўся пасля прызначэння Алег Стэльмашок. - І галоўная задача - усё гэта прымножыць, развіць у сучасных умовах, сучасных патрабаваннях. Быць максімальна павернутымі да людзей, слухаць іх, чуць. Бо самае галоўнае - увага да чалавека. Аператыўнае рэагаванне на яго праблемы і запатрабаванні. Таксама важна, даходзячы да кожнага, тлумачыць: тое, што мы маем - мір, бяспека, незалежнасць, суверэнітэт, як адзначае кіраўнік дзяржавы, - гэта трэба захаваць і кіравацца гэтым як у працоўных момантах, так і ў жыццёвых пазіцыях».

Юлія Таранава, фота Галіны Гаўрыловіч