Начная экскурсія і рамантычная прэм’ера: Магілёўскі драмтэатр закрывае сезон

Магілёўскі абласны драматычны тэатр 30 ліпеня закрые 133-ці сезон. У гэты дзень гледачоў чакае шмат сюрпрызаў, у тым ліку начная экскурсія па тэатры і прэм’ера рамантычнай трагікамедыі, расказала галоўны рэжысёр установы культуры Таццяна Пацай.

«Упершыню за ўсю гісторыю нашага тэатра мы вырашылі прыадчыніць заслону і пазнаёміць магілёўцаў і гасцей горада з нашым закуліссем–месцам, дзе творчы працэс не спыняецца ні на хвіліну, –адзначыла галоўны рэжысёр. – Таму да закрыцця чарговага тэатральнага сезона мы рыхтуем займальны і атмасферны праект «Ноч у тэатры».

Гледачоў чакае насычаная чатырохгадзінная праграма, якая возьме старт у 20.00 і прадоўжыцца да поўначы. Яна будзе складацца з некалькіх тэматычных блокаў. Перш за ўсё тэатралаў чакае доўгачаканая прэм’ера і творчы дэбют новага галоўнага рэжысёра на магілёўскай сцэне – спектакль «Аддай маё сэрца». Пастаноўка перанясе нас у Нью-Ёрк 60-х гадоў мінулага стагоддзя і раскажа аб усёпаглынальнай любові, узаемаразуменні і даверы паміж мужчынам і жанчынай. Рамантыка, танцы, смех і сваркі закаханых–і ўсё гэта пад музыку аднаго з самых камерцыйна паспяховых музыкантаў XX стагоддзя Элвіса Прэслі.

Пасля прэм’ернага паказу гледачы зробяць прагулку па ўсіх творчых цэхах, у тым ліку бутафорскім і касцюмерным. Яны даведаюцца гісторыю магілёўскага тэатра і пачуюць шматлікія легенды і прыпавесці, звязаныя з гэтым месцам. Таксама яны змогуць адчуць сябе ў ролі акцёраў: прымерыць касцюм, нанесці грым і нават прыняць удзел у тэатралізацыі. Жадаючыя паспрабуюць свае сілы ў акцёрскім майстэрстве, паўдзельнічаюць у майстар-класах і зробяць фота на памяць.

«Начны тэатр падрыхтаваў для сваіх наведвальнікаў шмат незвычайнага: напрыклад, у іх будзе магчымасць убачыць парадны кіцель, вышываны залатымі ніткамі, – расказала Таццяна Пацай. – Узрост гэтага экспаната нават большы за магілёўскі драмтэатр і налічвае больш за 140 гадоў. Паводле легенды, гэты касцюм перадалі тэатру прадстаўнікі царскага роду. Нават па сканчэнні столькіх гадоў ён захаваўся ў вельмі добрым стане».

У ноч закрыцця 133-га сезона з удзельнікамі праекта будуць працаваць сталкеры-акцёры, якія стануць праваднікамі па начным тэатральным свеце. За прапанаваны час яны пакажуць гледачам некалькі лакацый, у тым ліку арганізуюць экскурсію па сцэне. Колькасць месцаў на ўдзел у праекце «Ноч тэатра» абмежаваная – усяго 80 квіткоў. Нягледзячы на тое, што іх кошт нашмат вышэйшы за звыклы для магілёўцаў кошт–Br35, у тэатральнай касе на 30 ліпеня практычна ўсё распрададзена.

БЕЛТА