Рус Бел Eng 中文

Намеснік прэм’ер-міністра Беларусі Ігар Петрышэнка наведаў БРУ

Намеснік прэм’ер-міністра Беларусі Ігар Петрышэнка сёння наведаў Беларуска-Расійскі ўніверсітэт. Ён азнаёміўся з матэрыяльна-тэхнічнай базай ВНУ, выставай навуковых дасягненняў, а таксама сустрэўся са студэнтамі і выкладчыкамі ўстановы адукацыі.

Падчас размовы Ігар Петрышэнка надаў асаблівую ўвагу тэме моладзевай палітыкі, тэзісна патлумачыўшы выпрацаваныя падчас VI Усебеларускага народнага сходу прыярытэты на найбліжэйшую пяцігодку.

«Сёння, развіваючы эканоміку, умацоўваючы бяспеку, клапоцячыся пра здароўе, культуру, сацыяльную абароненасць грамадзян, мы імкнёмся бачыць перспектыву, планаваць сваю будучыню. Пры гэтым нязменна думаем пра тых, хто будзе будаваць гэту будучыню, – аб нашай моладзі, – падкрэсліў намеснік прэм’ер-міністра. – Менавіта таму для нас важна, якім выгадуем новае пакаленне, чаму яно навучыцца ў пару свайго сталення, якія традыцыі і каштоўнасці ўбярэ, на якія ідэалы будзе арыентавацца».

Ігар Петрышэнка звярнуў увагу, што ў Беларусі выбудаваная дзейсная сістэма сацыяльнай падтрымкі маладых людзей: ад атрымання адукацыі да працаўладкавання выпускнікоў, дапамогі маладым грамадзянам і іх сем’ям. Аднак падзеі апошняга часу, якія адбываюцца ў свеце, у тым ліку нашай краіне, паказалі, што існуючай сістэмы працы з моладдзю недастаткова. І на першы план павінен выходзіць узровень выхавання грамадзян. «Трываласць краіны пачынае вызначацца адказам на пытанне: мы даём моладзі для ўступлення ў самастойнае жыццё разам з глыбокімі ведамі правільныя жыццёвыя арыенціры, фарміруем у маладых людзях моцны маральны стрыжань?»– адзначыў намеснік прэм’ер-міністра.

Асновай для вызначэння дзейсных і прывабных формаў работы па выхаванні патрыятызму, грамадзянскай адказнасці за выбар, дзеянні і ўчынкі, на думку Ігара Петрышэнкі, павінны стаць дыскусійныя пляцоўкі з шырокім прывабліваннем моладзі, кіраўнікоў органаў дзяржкіравання, грамадскіх структур, бізнесу і іншых сфер. Разрозненыя мерапрыемствы варта аб’яднаць у цэласную сістэму, што дазволіць дасягнуць у пытаннях выхавання адзінства ўсіх сацыяльных інстытутаў: школы, ВНУ, сям’і, грамадскасці. «Крок за крокам, пастаянна і мэтанакіравана трэба вяртаць патрыятызм у душы дзяцей, падлеткаў, маладых людзей, пачынаючы з сям’і, працягваючы ў дзіцячым садзе, школе, ВНУ і пасля ўжо працаваць з маладымі спецыялістамі», – упэўнены намеснік прэм’ер-міністра.

Асаблівая ўвага павінна быць нададзена фарміраванню паважлівага стаўлення да дзяржаўнай сімволікі, падкрэсліў Ігар Петрышэнка. Сёння ва ўсіх установах адукацыі краіны ёсць адпаведныя тэматычныя куткі, вядзецца праца па папулярызацыі дзяржсімволікі сярод рознаўзроставых катэгорый. Але гэта ў большай ступеніпрывычныя, часам разавыя мерапрыемствы, а яны павінны быць штодзённымі, набыць масавы і сістэмны характар.

Намеснік прэм’ер-міністра таксама падкрэсліў: праблема выхавання –адна з самых шматгранных і складаных. Палітыка краіны ў гэтай галіне накіравана на фарміраванне маральных і грамадзянскіх якасцяў, ідэйнай перакананасці і павагі да беларускай дзяржаўнасці. Асаблівая роля ў гэтых пытаннях належыць адукацыі. Ужо ў бягучым навучальным годзе плануецца ўзмацніць ідэалагічны змест вучэбна-выхаваўчага працэсу ва ўстановах адукацыі, забяспечыць яго нарматыўнае і навукова-метадычнае суправаджэнне.

Спыніўся Ігар Петрышэнка і на мерапрыемствах, прадугледжаных дзяржпраграмай «Адукацыя і моладзевая палітыка» на бягучую пяцігодку. У прыватнасці, паведаміў, што больш за 30% устаноў вышэйшай адукацыі краіны павінны ўвайсці ў 5 тыс. найлепшых ВНУ свету па міжнародных рэйтынгах. Да гэтай мэты будзе імкнуцца і Беларуска-Расійскі ўніверсітэт, тым больш што патэнцыял у навучальнай установы значны. Два гады таму тут была рэалізавана ўнікальная праграма. Праект Саюзнай дзяржавы «Развіццё адукацыйнай і навуковай дзейнасці БРУ на базе інавацыйных тэхналогій» вывеў ВНУ на новы ўзровень у падрыхтоўцы кадраў для будаўніцтва, машынабудавання. Тут з’явіліся сучасныя вучэбна-эксперыментальныя лабараторыі, абсталяваныя па апошнім слове тэхнікі.

Як паведаміў рэктар БРУ Міхаіл Лусцянкоў, ВНУ развіваецца. Гэта адпавядае пасылам, якія гучалі на VI Усебеларускім народным сходзе. «Адным з тэзісаў на форуме было павышэнне якасці адукацыі. Рухаемся ў гэтым кірунку –адкрываем новыя спецыяльнасці. Толькі за апошнія два гады ў нас з’явілася восем свежых напрамкаў па беларускіх і расійскіх адукацыйных праграмах. Мы рыхтуем спецыялістаў у галінах машынабудавання, будаўніцтва, энергетыкі, IT-тэхналогій, эканомікі. Актыўна ўзаемадзейнічаем з навуковымі і адукацыйнымі арганізацыямі Расійскай Федэрацыі. У нас заключана больш за 100 міжнародных дагавораў. З іх больш за 60 –з ВНУ РФ, 20 –менавіта за апошнія некалькі гадоў», – расказаў Міхаіл Лусцянкоў. Акрамя гэтага, ВНУ ўдзельнічае ў эксперыментальным праекце «Універсітэт 3.0» і рыхтуе рынкаваарыентаваных спецыялістаў, якія могуць не толькі распрацоўваць нау-хау, але і рэалізоўваць іх на рынку.

Паводле слоў рэктара, у ВНУ маюць намер і далей пашыраць пералік спецыяльнасцей, асабліва тых, якія звязаны з высокатэхналагічнымі абласцямі прамысловасці. «Мы ўжо адыходзім ад канцэпцыі профільнага ўніверсітэта–тэхнічнага і эканамічнага, – растлумачыў Міхаіл Лусцянкоў. – Адкрыта гуманітарная спецыяльнасць «Замежнае рэгіяназнаўства». У мінулым годзе ўжо ажыццёўлены першы набор. Адкрываем і спецыяльнасці фізіка-матэматычнага кірунку. Рыхтуем дакументы на спецыяльнасці «Геадэзія», «Нафтагазавая справа». У цэлым стараемся даць абітурыентам шырокі выбар. За апошнія пяць гадоў развіцця нашай ВНУ адкрыта больш спецыяльнасцей, чым за ўвесь час яго існавання. Час патрабуе дынамічнага развіцця: мы павінны адпавядаць сучасным патрабаванням».

Дарэчы, усе студэнты ВНУ працаўладкоўваюцца, нават тыя, хто вучыцца на платнай аснове, калі жадаюць атрымаць першае месца працы. Спецыяльнасці машынабудаўнічага профілю, да прыкладу, зараз асабліва запатрабаваныя: на аднаго студэнта прыходзіцца часам па дзве-тры заяўкі.

У сваю чаргу, Ігар Петрышэнка паведаміў: сёння ў рэйтынгу ВНУ Беларусі БРУ займае 19 месца. «Вы рыхтуеце высакакласных спецыялістаў інжынерных спецыяльнасцей, – падкрэсліў ён. – Стаўце выразныя задачы, павышайце свой рэйтынг, у тым ліку дзякуючы павелічэнню колькасці замежных студэнтаў».

Падчас сустрэчы намеснік прэм’ер-міністра нямала гаварыў аб мэтавай падрыхтоўцы і размеркаванні. «Нашы апаненты дакараюць нас за нібыта прымусовую сістэму размеркавання. У той жа час многія замежныя студэнты, у тым ліку польскіх ВНУ, гавораць аб гэтай меры як аб вялікім дасягненні нашай краіны, – канстатаваў Ігар Петрышэнка. – Не кожная дзяржава сёння можа прадаставіць першае працоўнае месца выпускніку ўстановы адукацыі. Трэба шанаваць тое, што маем».

Ігар Петрышэнка дадаў, што да наймальнікаў сёння прад’яўляюцца жорсткія патрабаванні па стварэнні годных умоў для замацавання на працоўных месцах маладых спецыялістаў. «Гэта недапушчальна, калі пасля 1–2 гадоў адпрацоўкі яны з’язджаюць. Калі такое адбываецца, значыць, не спрацавалі на месцах, не стварылі неабходныя ўмовы для таго, каб моладзь стварыла тут сям’ю, рэалізавала патэнцыял і веды, якія атрымала пры навучанні ва ўстанове адукацыі», – упэўнены намеснік прэм’ер-міністра. У той жа час не варта забываць і пра адказнасць ВНУ за якасць падрыхтоўкі сваіх спецыялістаў.

Найважнейшая роля ў патрыятычнай і выхаваўчай працы моладзі належыць культуры, адзначыў Ігар Петрышэнка. Аднак яе патэнцыял у дадзенай працы, а таксама ўмацаванні беларускай дзяржаўнасці выкарыстоўваецца не ў поўнай меры. «Культура –падмурак нацыі, душа нашага народа. Не захаваем спадчыну і традыцыі, не прымножым іх, не далучым да іх моладзь – не пабудуем моцную і квітнеючую краіну», – канстатаваў намеснік прэм’ер-міністра.

Беларуска-Расійскі ўніверсітэт у Магілёве рыхтуе спецыялістаў па беларускіх і расійскіх адукацыйных праграмах. Ёсць 21 спецыяльнасць першай ступені, 7 спецыяльнасцей другой ступені вышэйшай адукацыі па беларускіх адукацыйных праграмах; 10 напрамкаў падрыхтоўкі бакалаўраў і 3 напрамкі падрыхтоўкі магістраў па расійскіх праграмах. Тут навучаецца амаль 5 тыс.студэнтаў. У бягучым годзе ВНУ адзначае 60-годдзе з дня заснавання.

Пры выкарыстанні матэрыялаў актыўная гіперспасылка на mogilev-region.gov.by абавязковая