Напярэдадні новага навучальнага года Анатоль Ісачанка наведаў Вішоўскую сярэднюю школу

Напярэдадні новага навучальнага года старшыня Магілёўскага аблвыканкама Анатоль Ісачанка наведаў Вішоўскую сярэднюю школу Бялыніцкага раёна.

Мэтай рабочага візіту стала азнаямленне з узроўнем падрыхтоўкі адукацыйнай установы да прыёму вучняў. Кіраўнік Прыдняпроўскага краю асабіста агледзеў адрамантаваныя навучальныя кабінеты, спартзалу, праверыў абсталяванне сталовай, а таксама ацаніў гатоўнасць школьнай тэрыторыі.

Старшыня аблвыканкама высока ацаніў праведзеную работу па падрыхтоўцы школы, адзначыўшы добрыя ўмовы для ўсебаковага развіцця дзяцей.

З кіраўніцтвам школы Анатоль Ісачанка абмеркаваў і актуальныя пытанні, якія тычацца адукацыйнага працэсу і падтрымкі настаўнікаў.

Дарэчы, падтрымліваць школу ў ідэальным парадку з году ў год дапамагае Бялыніцкі СВК «Калгас «Радзіма», кіруе якім Алег Лапацентаў. Гаспадарка заўсёды аказвае дапамогу ў падрыхтоўцы адукацыйнай установы да новага навучальнага года, выдзяляе стыпендыі навучэнцам і многае іншае. Сёлета пры дапамозе гаспадаркі ў школе поўнасцю адрамантаваны два навучальныя кабінеты, заменены лінолеум.

Старшыня Магілёўскага аблвыканкама падкрэсліў: установы адукацыі Магілёўскай вобласці гатовы да новага навучальнага года. На сённяшні дзень пашпарты гатоўнасці падпісаны на 96%.

- Каля 100 млн рублёў дзяржава ўкладвае ў сістэму адукацыі Магілёўскай вобласці. З іх 54 млн рублёў накіравана на капітальны рамонт, а астатняя сума - на бягучы рамонт. У новым навучальным годзе ў рэгіёне за парты сядуць 114,2 тысячы школьнікаў, з іх 10,5 тысячы першаклашак, - пазначыў кіраўнік Прыдняпроўскага краю.

Гаворачы аб падрыхтоўцы Вішоўскай сярэдняй школы да новага навучальнага года, Анатоль Ісачанка падкрэсліў: тут адчуваецца гаспадарскі падыход.

— На прыкладзе гэтай навучальнай установы важна адзначыць ролю Бялыніцкага СВК «Калгас «Радзіма» ва ўзаемадзеянні з адміністрацыяй школы. Паміж гаспадаркай і ўстановай адукацыі створаны добрыя партнёрскія адносіны, калі прадпрыемства сапраўды дапамагае школе, і тут размова ідзе не толькі аб падрыхтоўцы школы да новага навучальнага года, - адзначыў Анатоль Ісачанка. - Кожную чвэрць дзецям, якія добра вучацца, вядуць актыўны лад жыцця або дабіваюцца значных вынікаў у спорце, гаспадарка выплачвае стыпендыю - ад 70 да 100 рублёў у залежнасці ад дасягненняў дзяцей. Гэта добрая матывацыя. Акрамя таго, работнікам прадпрыемства выплачваецца надбаўка да асноўнай заработнай платы за тое, што яны дастойна займаюцца выхаваннем дзіцяці. Прадпрыемства матэрыяльна дапамагае работнікам, у якіх ёсць дзеці, у падрыхтоўцы да школы. Самае галоўнае, што гэта не разавая акцыя, а сістэмная праца, якая ў СВК «Калгас «Радзіма» вядзецца на працягу многіх гадоў. Усё гэта разам дае вынік: 42 працэнты ўсіх работнікаў гаспадаркі - гэта тыя людзі, якія скончылі Вішоўскую сярэднюю школу. Гэта сведчыць аб тым, што людзі хочуць працаваць на роднай зямлі. Тут яны ствараюць сем'і і ўжо сваіх дзяцей прыводзяць у родную школу. Гэта шмат аб чым кажа, - рэзюмаваў губернатар.

Дырэктар Вішоўскай сярэдняй школы Вольга Цярэшчанка пазначыла: у новым навучальным годзе школа расчыніць дзверы для 215 навучэнцаў, у тым ліку 19 першакласнікаў.

- Школа гатова сустракаць сваіх вучняў. Абноўлены ўсе навучальныя кабінеты, спартзала, харчаблок — тут зроблены касметычны рамонт. Велізарная падзяка СВК «Калгас «Радзіма» - заўсёды аказваюць нам усебаковую дапамогу і падтрымку. Напрыклад, сёлета дапамаглі адрамантаваць два навучальныя класы, — патлумачыла дырэктар установы адукацыі.

Старшыня Бялыніцкага райвыканкама Вольга Прыстромская паведаміла, што ў раёне ўсе восем школ гатовы да пачатку новага навучальнага года.

- У гэтым годзе праведзена рэканструкцыя Галоўчынскай сярэдняй школы, зроблены вялікі аб'ём працы. Гаворачы аб прыкладах супрацоўніцтва ўстаноў адукацыі з прадпрыемствамі раёна, магу сказаць, што заўсёды пры падрыхтоўцы да новага навучальнага года або па іншых пытаннях установы адукацыі супрацоўнічаюць з прадпрыемствамі і арганізацыямі раёна, якія з задавальненнем адгукаюцца і прыходзяць на дапамогу, - дадала Вольга Прыстромская.

mogilevnews.by