Наша задача - развіваць рэгіён, захоўваючы стабільнасць і адзінства

У Кіраўску прайшла сустрэча старшыні Магілёўскага аблвыканкама Анатоля Ісачанкі з актывам раёна, на якой былі падведзены вынікі 2024 года і абазначаны планы на будучыню. На мерапрыемстве прысутнічалі прадстаўнікі розных сфер: мясцовай улады, адукацыі, аховы здароўя, культуры, а таксама актывісты і грамадскія дзеячы. Галоўнай мэтай сходу стала абмеркаванне ключавых пытанняў сацыяльна-эканамічнага развіцця раёна і задач на 2025 год.

Адкрываючы сустрэчу, Анатоль Ісачанка адзначыў важнасць дыялога з жыхарамі раёна, падкрэсліўшы, што менавіта іх меркаванне павінна ляжаць у аснове прымаемых рашэнняў. «Сёння як ніколі актуальная фраза «моцныя рэгіёны - моцная краіна». Мы павінны развіваць ініцыятыву і ўдасканальваць дыялог з жыхарамі, каб эфектыўна вырашаць найважнейшыя праблемы. Толькі такі падыход прынясе вынік», - сказаў ён.

У ліку прыярытэтных напрамкаў работы кіраўнік рэгіёну назваў развіццё інфраструктуры, паляпшэнне жыллёва-камунальнай гаспадаркі і ўмацаванне сацыяльнай сферы. Асаблівая ўвага была ўдзелена пытанням рамонту дарог і добраўпарадкавання. За мінулы год у раёне было адрамантавана больш за 34 кіламетры дарог, на што накіравана звыш Br12 млн. Для выканання работ набыта спецыялізаваная тэхніка, уключаючы два трактары МТЗ і дарожны каток. У 2025 годзе фінансаванне на рамонт мясцовых дарог складзе больш за Br10 млн., а таксама прадугледжана Br1,9 млн. на рамонт вуліц у населеных пунктах.

Гаворачы аб добраўпарадкаванні, Анатоль Ісачанка падкрэсліў важнасць прыцягнення жыхароў да сумеснай работы: «Нам неабходна больш актыўна прыцягваць усіх жыхароў раёна. Толькі сумеснымі намаганнямі мы зможам забяспечыць парадак і якасныя змены». Акрамя таго, у аграгарадку Жылічы будзе праведзены комплексны рамонт вуліц, на што выдзелена больш як Br1 млн. У 2025 годзе таксама запланавана добраўпарадкаванне дваровых тэрыторый, устаноўка новых дзіцячых пляцовак, што стане прадаўжэннем паспяховай практыкі папярэдняга года.

Не менш важнымі тэмамі сталі ахова здароўя і адукацыя. У 2024 годзе для Кіраўскай цэнтральнай раённай бальніцы былі закуплены тры новыя аўтамабілі, два з якіх — машыны хуткай медыцынскай дапамогі. Таксама набыта эндаскапічнае абсталяванне і абсталяванне для функцыянальнай дыягностыкі. «Цяпер ад медыкаў залежаць якасць і даступнасць медыцынскіх паслуг, а галоўнае - чалавечнае стаўленне да людзей», - падкрэсліў старшыня аблвыканкама.

У сферы адукацыі дасягнуты значныя поспехі. Завершана замена аконных блокаў ва ўсіх школах раёна, што стала важным крокам у стварэнні камфортных умоў для вучняў. У 2024 годзе колькасць медалістаў у раёне павялічылася з аднаго да пяці чалавек, што пацвярджае паляпшэнне якасці ведаў навучэнцаў. У 2025 годзе плануецца выдзяленне каля Br700 тыс. на падрыхтоўку адукацыйных устаноў да новага навучальнага года, уключаючы добраўпарадкаванне тэрыторый дашкольных устаноў і абнаўленне гульнявога абсталявання. Харчаванне ў школах таксама арганізавана па новых стандартах, што садзейнічае паляпшэнню якасці школьных абедаў.

Аграпрамысловы сектар стаў яшчэ адной ключавой тэмай абмеркавання. У 2024 годзе раён дасягнуў росту валавой прадукцыі сельскай гаспадаркі на больш як 4%. Гэта стала магчымым дзякуючы падтрымцы дзяржавы, якая ўключае закуп новай тэхнікі і мадэрнізацыю жывёлагадоўчых комплексаў. Напрыклад, летась былі ўведзены ў эксплуатацыю тры малочнатаварныя комплексы і пабудаваны сіласна-сянажныя траншэі, што дало магчымасць палепшыць умовы захоўвання кармоў. «З боку дзяржавы зроблена шмат. Цяпер слова за аграрыямі. Утрыманства быць не павінна», - заявіў Анатоль Ісачанка, падкрэсліваючы важнасць захавання тэхналогій у раслінаводстве і жывёлагадоўлі.

Асаблівая ўвага была ўдзелена развіццю турыстычнага патэнцыялу раёна. Мемарыяльны комплекс памяці спаленых вёсак у Борках і палацава-паркавы комплекс у Жылічах з'яўляюцца знакавымі аб'ектамі, здольнымі прывабіць турыстаў. «Мы ўжо зрабілі шмат, але неабходна ствараць свой турыстычны кластар, развіваць інфраструктуру і павышаць якасць падзейных мерапрыемстваў», - адзначыў старшыня аблвыканкама.

Падводзячы вынікі, Анатоль Ісачанка адзначыў, што, нягледзячы на цяжкасці, раён прадаўжае дэманстраваць стабільнае развіццё. Сярод ключавых задач на наступны год - далейшае ўмацаванне сельскай гаспадаркі, мадэрнізацыя інфраструктуры і павышэнне турыстычнага патэнцыялу. «Мы шмат зрабілі, але наперадзе яшчэ больш. Наша задача - развіваць рэгіён, захоўваючы стабільнасць і адзінства. Кожны павінен усведамляць сваю ролю ў пабудове будучыні, якую мы ствараем разам», - сказаў на заканчэнне ён.

Удзельнікі выказалі гатоўнасць да актыўнай работы, накіраванай на дасягненне пастаўленых мэт і паляпшэнне якасці жыцця жыхароў Кіраўскага раёна.

 mogilevnews.by