«Нашчадкам Вялікай Перамогі». У кожным райцэнтры Магілёўскай вобласці з’явяцца інтэрактыўныя дзіцячыя пляцоўкі

У Год гістарычнай памяці ў Магілёўскай вобласці рэалізуецца маштабны праект «Нашчадкам Вялікай Перамогі!». У кожным раённым цэнтры напярэдадні Дня Незалежнасці моладзь і мясцовыя жыхары, грамадскія аб’яднанні і арганізацыі ствараюць і ўладкоўваюць інтэрактыўныя пляцоўкі, на якіх дзеці змогуць вывучаць гісторыю свайго рэгіёна. 2 ліпеня адкрыецца 28 такіх зон адпачынку. У Бялынічах новая лакацыя – «Салют перамозе!» – практычна гатовая: сёння кіраўніцтва Магілёўскага аблвыканкама разам з гараджанамі дарабляла фінальныя рыскі.

Новая гульнявая зона размясцілася каля фізкультурна-аздараўленчага комплексу «Друць» у Бялынічах. Побач парк, шматпавярховая забудова. Анджэла Фаміных з сынам Арсеніем жывуць у доме насупраць. Убачылі, што ўладкоўваецца новае месца для адпачынку і вырашылі зазірнуць.

– Мне вельмі падабаецца дзіцячая пляцоўка, – не хавае эмоцый Арсеній. – Пакатаўся на самалёце, арэлях. Тут вельмі весела!

– Гэта выдатна, што для дзетак уладкавалі такое месца, – заўважае мама Анджэла. – У двары няма сваёй пляцоўкі, а тут такі падарунак. У нашым доме шмат дзетак, гульнявая ім прыйдзецца па душы. Дзеці будуць не сядзець дома, а знаходзіцца на свежым паветры. Плюс пазнаёмяцца з гісторыяй. На стэнды нанесены спасылкі для пераходу на старонкі з інфармацыяй аб раёне, яго ваенным мінулым. Дзеці павінны больш ведаць на гэту тэму. У школе дзецям шмат расказваюць аб Вялікай Айчыннай вайне, мы, бацькі, ім тлумачым, але тут усё зразумела. Задумка вельмі добрая!

У кожнай пляцоўкі – свая канцэпцыя. Элементы, устаноўленыя на пляцоўках, дапамогуць прывабіць моладзь да вывучэння гісторыі роднага краю. Гэта і QR-коды з пераходам на інтэрнэт-старонкі з гістарычным матэрыялам, арт-аб’екты, стылізаваныя фотазоны, квэст-пляцоўкі, ваенна-спартыўныя палосы перашкод і многія іншыя. У Бялынічах стылізаваная інтэрактыўная зона прысвечана подзвігу савецкага народа ў гады Вялікай Айчыннай вайны. У цэнтры дзіцячы гульнявы комплекс і палосы перашкод, па перыметры – пліта ў выглядзе зорак і 3D-кубоў з нанясеннем QR-кодаў з інфармацыяй аб асноўных этапах ваенных дзеянняў на тэрыторыі раёна і яго вызваленні ад нямецка-фашысцкіх захопнікаў. Тут размясціліся альтанка, тэматычныя фотазоны.

– На пляцоўку змогуць прыйсці маленькія дзеткі, моладзь, сем’і. Тут можна будзе не толькі пагуляць, але і азнаёміцца з выставамі, – упэўнена галоўны спецыяліст аддзела ідэалагічнай работы, культуры і па справах моладзі Бялыніцкага райвыканкама Кацярына Карпікава. – На спецыяльных банарах, стылізаваных пад лісты, нанесены QR-коды. З іх дапамогай можна даведацца аб розных перыядах гісторыі. Да прыкладу, адзін з банараў прысвечаны жаночым лёсам у гады вайны. Разам з нашай бібліятэкай распрацавалі альбом памяці. У ім архіўныя даныя аб жыхарках нашага раёна – жанчынах-гераінях, якія былі партызанкамі, ваявалі на франтах. У нас восем такіх банараў з рознай тэматыкай: турыстычна-краязнаўчая карта раёна, кніга «Памяць», сем цудаў раёна.

Дарэчы, месца для ўладкавання пляцоўкі абрана невыпадкова. Побач парк «20 гадоў Перамогі», ФАК, шматпавярховая забудова. У раёне шмат моладзі, дзяцей. Такога месца тут папросту не хапала: тут будуць праходзіць гарадскія і патрыятычныя святы.

Трохгадовая Лера Старавойтава ацаніла арэлі на гульнявой зоне. Дзяўчынку на пляцоўку прывёў тата Дзмітрый:

– У нашым горадзе з’явілася выдатнае месца. Дачцэ тут весела. Ды і даросламу цікава: можна даведацца новыя факты з гісторыі. Думаю, месца стане любімым у гараджан.

У Дрыбінскім раёне тэматычная пляцоўка пад назвай «На вышыні» стылізавана пад размяшчэнне 46 гвардзейскага начнога бамбавальнага авіяпалка, які цалкам складаўся з жанчын. Іх празвалі «начныя ведзьмы». Стварыла яго вядомая лётчыца – Герой Савецкага Саюза Марына Міхайлаўна Раскова. На пляцоўцы будуць размешчаны мадэлі ваенных самалётаў, фігуры лётчыц, ваеннай тэхнікі, установяць гульнявое абсталяванне для розных узростаў, стылізаванае пад штаб палка, і стэнд «Ваенны веснік». У Клічаўскім раёне размесціцца «Партызанская паляна», прысвечаная цэнтру беларускага партызанскага руху ва Усакінскіх лясах. На пляцоўцы – макеты партызанскай зямлянкі, кулямёта Дзегцярова, назіральны пункт.

– Такі маштабны праект прапанавала рэалізаваць сама моладзь, – адзначыў старшыня Магілёўскага аблвыканкама Анатоль Ісачанка. – І ў Год гістарычнай памяці мы вырашылі зрабіць гэтыя пляцоўкі тэматычнымі. Кожны раён прыдумаў сваю тэматыку і назву, бо ў кожнага з іх свая гісторыя, якую можна расказаць і паказаць. Акцыю прапанавала моладзь, мы з задавальненнем яе падхапілі. І сёння ўсе разам, талакой, уладкоўваем зоны адпачынку. Прыемна, што да праекта далучыліся ветэраны, БРСМ, прадстаўнікі грамадскіх арганізацый. Гэта наш агульны ўклад у адну справу.

Анатоль Ісачанка ўпэўнены, што менавіта з дзіцячых гадоў неабходна выхоўваць патрыятызм, любоў да свайго краю:

– Вось такім невялікім пасылам мы стараемся прывіваць любоў да Радзімы. У нас праходзіць яшчэ адна цікавая акцыя. Моладзь БРСМ прапанавала добры рух – «Зрабі наш горад лепшым». Кожны жыхар Магілёва можа не толькі паказаць на нейкія недахопы, але і выправіць іх. Адны зрабілі кветнік, другія паправілі лавачку. У нас цудоўная моладзь! І мы стараемся не толькі слухаць, але і чуць. І прыклад вы бачыце сёння тут. Трэба жыць у сваёй краіне, на сваёй радзіме і рабіць усё, каб яна была яшчэ больш прыгожай і ўтульнай.

СБ, фота БЕЛТА