Нашчадкі воінаў-пераможцаў годна прадстаўляюць нашу краіну, абараняюць і захоўваюць яе цэласнасць – Леанід Заяц

Нашчадкі воінаў-пераможцаў годна прадстаўляюць нашу краіну, абараняюць і захоўваюць яе цэласнасць. На гэта звярнуў увагу старшыня Магілёўскага аблвыканкама Леанід Заяц падчас мітынгу-рэквіема «Звон смутку» на Буйніцкім полі.

Традыцыйнае мерапрыемства, прысвечанае Дню ўсенароднай памяці ахвяр Вялікай Айчыннай вайны, прайшло на мемарыяльным комплексе сёння а чацвёртай гадзіне раніцы. Яно сабрала больш за 1 тыс. чалавек – прадстаўнікоў выканаўчай улады, Беларускай Праваслаўнай Царквы, грамадскіх аб’яднанняў, працоўных калектываў, членаў патрыятычных клубаў, актыў БРСМ, навучэнцаў і студэнтаў.

«На гэтым святым для кожнага беларуса месцы нас сабраў боль і глыбокі смутак, успаміны аб трагедыі, велізарнай бядзе, мужнасці і стойкасці нашага народа, – адзначыў кіраўнік рэгіёна. – 22 чэрвеня роўна 80 гадоў таму фашысцкая Германія без аб’яўлення вайны вераломна напала на Савецкі Саюз, нанесла страшэнны ўдар па нашых гарадах і вёсках. І мэтай было заняволіць і знішчыць наш народ».

Леанід Заяц выказаў шчырыя словы ўсім, хто набліжаў і ўнёс уклад у Вялікую Перамогу. «Сёння мы з гонарам успамінаем абаронцаў Брэсцкай крэпасці, якія прынялі на сябе першы ўдар, абаронцаў Магілёва, якія жывым шчытом сталі на шляху ворага. Мы аддаём даніну глыбокай павагі байцам Чырвонай арміі, партызанам-падпольшчыкам, працаўнікам тылу. Смуткуем пра тых, хто не вярнуўся з франтоў, закатаваны ў нямецкіх засценках, упаў са зброяй у руках, не перанёс катаванні той вайны».

«Памятаючы ўсе ўрокі гісторыі, сыны пакалення пераможцаў годна выконваюць запавет продкаў, – канстатаваў старшыня аблвыканкама. – Будуюць незалежную краіну, сеюць хлеб, гадуюць дзяцей, тым самым умацоўваючы моц сваёй зямлі».

Абарона Магілёва – адна з яркіх старонак вайны, дзе ў адзінае цэлае злілося трагічнае і гераічнае. Абаронцы Дняпроўскай мяжы самааддана трымалі абарону 23 дні і ночы, даўшы магчымасць выйграць час для мабілізацыі сіл на адпор ворагу. Толькі на працягу адных сутак на Буйніцкім полі нашы войскі знішчылі 39 варожых танкаў і бронетранспарцёраў, 350 фашыстаў. Архіепискап Магілёўскі і Мсціслаўскі Сафроній падкрэсліў: тут змагаліся людзі розных нацыянальнасцей, веравызнанняў і ўзросту. Але ўсіх іх аб’ядноўвала адно – любоў да сваёй Айчыны і народа.

«Многія воіны не дажылі да слаўнай перамогі, сышлі ў іншы свет, але яны выканалі асноўную евангельскую запаведзь: няма большай любові, чым душу сваю пакласці за сяброў сваіх. Царква падзяляла смутак свайго народа і дапамагала матэрыяльна і духоўна. Мы памятаем і молімся за загінулых воінаў. Ім слава і вечная памяць», – адзначыў Уладыка Сафроній.

80 гадоў таму сталёвыя фразы Юрыя Левітана, якія апавясцілі аб пачатку вайны, падзялілі жыцці мільёнаў савецкіх грамадзян на «да» і «пасля». Для многіх, хто не вярнуўся з фронту, быў закатаваны ў канцлагерах і турмах, занесены ў спісы зніклых без вестак, яны аказаліся пачаткам шляху ў неўміручасць. Сёння там, дзе прайшлі баі, спачывае прах герояў, якія сталі на шляху ворага, стаяць манументы і абеліскі вечнай славы і памяці. Удзельнікі мітынгу-рэквіема ўсклалі кветкі да капліцы на Буйніцкім полі, ушанавалі хвілінай маўчання памяць тых, хто не вярнуўся з бітваў, памёр ад ран і хвароб, голаду і холаду, быў закатаваны ў канцлагерах гестапа, расстраляны, павешаны, памяць спаленых жывымі салдат і камандзіраў, партызан і падпольшчыкаў, працаўнікоў тылу, мірных жыхароў акупаваных тэрыторый, пажылых, дарослых і зусім юных, старых, жанчын і дзяцей, ветэранаў, якія не дажылі да нашых дзён. Як напамін аб 80 мірных гадах былі запаленыя свечкі. З пажаданнямі згоды на беларускай зямлі ў неба запусцілі паветраныя шары – сімвалы міру і шчаслівага дзяцінства. Па ўсіх суайчынніках, якія загінулі на палях бітваў і на акупаванай немцамі тэрыторыі, адслужылі літыю.

Аналагічныя мерапрыемствы сёння пройдуць ва ўсіх раёнах і гарадах Магілёўскай вобласці. А апоўдні адбудзецца Усебеларуская хвіліна маўчання, у храмах Беларускай праваслаўнай царквы загучыць звон. Усіх жыхароў Магілёўскай вобласці запрашаюць далучыцца да хвіліны маўчання – задумацца і ўспомніць аб тых, хто аддаў жыцці за нашу мірную сучаснасць і будучыню. Ушанаваць памяць герояў кожны можа ў сябе дома, у дарозе або на працоўным месцы.

Вольга Емельянава, фота Галіны Гаўрыловіч