Наталля Качанава: мы закладваем у выхаванне моладзі асновы, якія будуць працаваць на карысць краіны ў будучыні

Мы сёння закладваем у выхаванне моладзі асновы, якія будуць працаваць на дабрабыт краіны ў будучыні. Такое меркаванне выказала старшыня Савета Рэспублікі Наталля Качанава падчас сустрэчы з навучэнцамі Рэчкаўскай і Бракаўскай сярэдніх школ Магілёўскага раёна.

«Сёння мы закладваем у выхаванне моладзі тыя асновы, якія будуць працаваць на карысць краіны ў будучым», – адзначыла яна падчас сустрэчы.

Наталля Качанава прыехала на сустрэчу да школьнікаў з падарункамі: юным спартсменам яна прывезла валейбольныя мячы. Пасля ўручэння спартыўнага інвентару старшыня Савета Рэспублікі паразмаўляла з вучнямі. Пытанні яны задавалі розныя: чым ганарыцца старшыня Савета Рэспублікі найбольш і што трэба зрабіць, каб атрымаць такую высокую пасаду. Наталля Качанава адзначыла, што ў нашай краіне чалавек любой прафесіі патрэбны і важны. Самае галоўнае – справядлівыя і сумленныя адносіны да працы і людзей, з якімі жывеш і працуеш.

Адказваючы на пытанне, чым яна ганарыцца, старшыня Савета Рэспублікі адзначыла некалькі важных момантаў. «Больш за ўсё я ганаруся тым, што ў мяне ёсць дзеці і ўнукі. Для жанчыны гэта вельмi важна. А яшчэ я ганаруся тым, у якой цудоўнай краіне жыву. І кожны дзень свайго жыцця я магу рабіць нешта дзеля таго, каб краіна развівалася. І мы хочам, каб у гэтай цудоўнай краіне жылі і раслі нашыя нашчадкі, гэта значыць вы», – звярнулася яна да школьнікаў.

Сярод пытанняў прагучала і такое: якой бачыць Наталля Качанава Беларусь праз 5 гадоў? Яна адказала, што мірнай, такой, дзе няма вайны. «Гэта будзе краіна, у якой любяць і шануюць блізкіх, з дабром ставяцца адзін да аднаго. Нашая краіна такая, якой мы яе стварылі. І гэта мы з вамі, паволі, стваралі, і вы будзеце працягваць яе развіваць. Я вельмі хачу, каб вы – тыя, хто будзе пасля нас, – дакладна ўсведамлялі, што наша краіна павінна быць суверэннай і міралюбівай. Тут павінны жыць людзі, адданыя сваёй краіне, якія любяць малую радзіму», – падкрэсліла яна.

Яшчэ адно пытанне: чаму хоча навучыцца Наталля Качанава? Яна падзялілася са школьнікамі, што ўжо шмат у жыцці ўмее і ведае, але засталася мара навучыцца танцаваць. Дзеці падзякавалі ёй за шчырыя і цікавыя адказы, а ў канцы папрасілі зрабіць на памяць агульную фатаграфію. «Не кожны дзень у нас такія госці», – сказалі школьнікі.

Наталля Качанава сёння наведвае ЗАТ «Агракамбінат “Зара”» ў Магілёўскім раёне. Яна азнаёмілася з тэхналагічнымі працэсамі сельскагаспадарчага прадпрыемства, наведала сацыяльныя аб’екты, дзе сустрэлася са школьнікамі і працоўным калектывам агракамбіната.

БЕЛТА