RU BY EN 中文
Twitter Instagram

Наталля Качанава: неабходна граматна падыходзіць да рэалізацыі праграм па развіцці рэгіёнаў

Неабходна граматна падыходзіць да рэалізацыі праграм па развіцці рэгіёнаў. Такое меркаванне выказала старшыня Савета Рэспублікі Наталля Качанава падчас пасяджэння Савета па ўзаемадзеянні органаў мясцовага самакіравання пры Савеце Рэспублікі.

«Кіраўнік дзяржавы Аляксандр Лукашэнка прыняў абсалютна правільнае рашэнне па развіцці рэгіёнаў, якія пацярпелі ад аварыі на Чарнобыльскай АЭС. Мы сустракаліся з людзьмі на тых аб’ектах, якія наведвалі, – і яны выказвалі падзяку за тое, што зроблена з боку дзяржавы і ўрада. Дзякавалі Прэзідэнту– за прынятыя праграмы па падтрымцы і развіццю гэтых рэгіёнаў. Людзі з вялікім задавальненнем гавораць пра тое, што робіцца шмат і правільна, – адзначыла Наталля Качанава. – Якія б добрыя праграмы і законы ні прымаліся, але многае залежыць ад таго, як яны рэалізуюцца. Неабходна граматна і рацыянальна падыходзіць да іх рэалізацыі».

Адно з важных пытанняў, якое разглядалася на пасяджэнні савета, –работа мясцовых органаў улады. «Мы прыехалі сюды для таго, каб разгледзець працу мясцовых органаў улады па рэалізацыі гэтых праграм. Тое, што мы ўбачылі сёння ў Слаўгарадзе, вядома, заслугоўвае ўсякай пахвалы. Тут не толькі асвойваюцца сродкі, якія вылучаюцца на развіццё, але і адкрываюцца вытворчасці –гэта вельмі важна. Тут будуецца філіял нашага вядомага прадпрыемства «Чырвоны харчавік», які дасць людзям працу, а гэта больш за 100 працоўных месцаў. Пабудаваны новы дзіцячы сад. І вельмі важны паказчык, што тут павялічваецца нараджальнасць. Дэмаграфічная бяспека – адна з прыярытэтных задач для нашай дзяржавы. А тут як раз усё ў комплексе рэалізоўваецца дзякуючы тым праграмам і рашэнням, якія прынятыя раней», – адзначыла Наталля Качанава.

«У Магілёўскай вобласці адчуваецца гаспадарскі падыход да ўсяго. За непрацяглы час мы бачым, як завяршаецца будаўніцтва аб’ектаў, якія стаялі дзесяцігоддзямі. Старшыня Магілёўскага аблвыканкама Леанід Заяц адзначыў, што да 7 лістапада ў Магілёве будзе завершаны аб’ект, які вельмі патрэбны абласному цэнтру, – тут больш за 160 тыс. насельніцтва і не было годнага спартыўнага комплексу, – падкрэсліла старшыня Савета Рэспублікі. – Мы ўбачылі ў Слаўгарадзе добраўпарадкаванне Блакітнай крыніцы –гэта турыстычны цэнтр. Яго ўладкавалі і ён будзе прыносіць дывідэнды ў эканоміку раёна, Магілёўскай вобласці і краіны ў цэлым. Усюды патрэбны гаспадарскі падыход –выразна вывераны і рацыянальны».

Як адзначыў старшыня Магілёўскага аблвыканкама Леанід Заяц, у склад паўднёва-ўсходняга рэгіёна ўваходзіць сем раёнаў Магілёўскай вобласці. І Слаўгарадскі раён –адзін з іх. «Прэзідэнт паставіў перад аблвыканкамам, урадам задачы па развіцці гэтай тэрыторыі. У склад паўднёва-ўсходняга рэгіёна ўваходзіць шэраг раёнаў, якія пацярпелі ў выніку аварыі на Чарнобыльскай АЭС. З 2016 па 2020 год паўднёвы ўсход істотна дадаў у сваім развіцці. Укладзена нямала фінансавых сродкаў у рэальны сектар эканомікі, – расказаў губернатар. – Павялічылася выручка ад рэалізацыі прадукцыі ў два разы, у 1,7 раза ўзрасла заработная плата. Да таго ж, выраслі паказчыкі вытворчасці малака. За 2020 год паўднёвы ўсход прырос у 1,4 разы па вытворчасці збожжа, у 1,7 –рапсу. Паўднёвы ўсход забяспечыў рост грашовай выручкі, павялічыў прадукцыйнасць у 1,2 разы ў параўнанні з 2019 годам».

 

Па словах старшыні аблвыканкама, прымаюцца дадатковыя меры для паляпшэння сацыяльнага складніка раёнаў. «У Касцюковічах, да прыкладу, завяршаецца будаўніцтва Дома культуры, у Хоцімску плануем пабудаваць плавальны басейн, у Чэрыкаве адрамантавалі школы. На кантролі і медабслугоўванне. Наяўная база будзе ўдасканальвацца. У Касцюковіцкім і Краснапольскім раёнах практычна завершана газіфікацыя аграгарадкоў. Прэзідэнт паставіў задачу забяспечыць у найбліжэйшым пяцігоддзі ўзровень жыцця людзей паўднёва-ўсходніх тэрыторый не ніжэй, чым сярэдні па Магілёўскай вобласці», – падкрэсліў Леанід Заяц.

БЕЛТА

 

 

 

Пры выкарыстанні матэрыялаў актыўная гіперспасылка на mogilev-region.gov.by абавязковая