Навагодні баль для адораных дзяцей пройдзе ў Бабруйску 12 снежня

Навагодні гарадскі баль для дзяцей, якія дабіліся высокіх вынікаў у вучобе, творчасці і спорце, пройдзе ў Бабруйску 12 снежня. Пра гэта паведаміла начальнік упраўлення адукацыі Бабруйскага гарвыканкама Алена Лісіца.

Удзельнікамі навагодняга балю стане каля 130 дзяцей. «Усе яны –пераможцы розных алімпіяд, творчых конкурсаў і спартыўных спаборніцтваў. Павіншаваць рабят прыйдуць прадстаўнікі гарвыканкама і дэпутаты. З надыходзячымі навагоднімі і каляднымі святамі ўсіх прысутных павіншуюць Дзед Мароз і Снягурка», – расказала Алена Лісіца.

Як у найлепшых традыцыях сапраўдных баляў, дзяўчаты будуць у вячэрніх і бальных сукенках, а хлопцы – у касцюмах. Яны будуць танцаваць венскі вальс, паланэз і іншыя класічныя танцы. Пасля гэтага ўдзельнікаў будзе чакаць дзіцячая навагодняя дыскатэка.

Усе ўдзельнікі навагодняга мерапрыемства атрымаюць падарункі.

БЕЛТА