Наведванне прамысловых прадпрыемстваў, круглыя сталы і адкрыццё выставы - вынік першага дня знаходжання дэлегацыі Прыдняпроўскага краю ў Кітаі

Бізнес-дэлегацыя Магілёўскай вобласці ў першы дзень візіту ў Кітайскую Народную Рэспубліку, 16 мая, наведала прамысловыя прадпрыемствы горада Цяньцзінь. Прэзентаваць сваю прадукцыю, абмеркаваць пытанні супрацоўніцтва і абмяняцца вопытам падчас правядзення Дзён Магілёўскай вобласці ў Кітаі прыбылі вядучыя прадпрыемствы Прыдняпроўскага краю: ААТ «Бабулін гладыш» - кіруючая кампанія холдынгу «Магілёўская малочная кампанія «Бабулін гладыш», ААТ «Магілёўскі мясакамбінат», ААТ «Бабруйскі мясакамбінат», ААТ «Чырвоны харчавік», ААТ «Малочныя горкі», ЗТАА «Горацкі харчовы камбінат», ААТ «Булачна-кандытарская кампанія «Дамачай», ААТ «Магатэкс» і іншыя.

У праграме наведвання - ТАА «Міёка Ранда», якое спецыялізуецца на вытворчасці малочных прадуктаў, а таксама ТАА «Сіцяньлон развіццё тэхналогій», які вырабляе спажывецкія і кухонныя тавары, ТАА «Цяньцзінь тэкстыльная група» і іншыя.

Адкрыццё выставы дэгустацыі прадукцыі Магілёўскай вобласці ў Цяньцзіні запланавана на 17 мая.

Для прадстаўнікоў сферы культуры рабочая праграма пачалася з правядзення круглага стала «Культурная спадчына ў прафесійным музычным мастацтве» ў Цяньцзіньскай кансерваторыі. Акрамя таго, у фармаце тэлемоста паміж Магілёвам і Цяньцзінем праведзены круглыя сталы ў сферах адукацыі і маладзёжнай палітыкі.

У гэты дзень таксама адбылося адкрыццё фотавыставы «Магілёўшчына – жамчужына Беларусі», з фонавым музычным суправаджэннем і дэманстрацыяй на мультымедыйным экране відэаролікаў пра Прыдняпроўскі край.

Юлія Таранава