Навучэнцы Магілёўскага абласнога ліцэя № 3 звярнуліся са словамі падтрымкі да медыцынскіх работнікаў

Акцыі падзякі і падтрымкі ўрачоў праходзяць па ўсім свеце. Менавіта медработнікі, знаходзячыся ў групе рызыкі, нялёгкай паўсядзённай працай абараняюць найвялікшыя каштоўнасці, падараваныя чалавеку, – яго жыццё і здароўе. Таму кожнае, нават ледзь чутнае, самае маленькае «дзякуй» становіцца гучным і значным, у сто разоў узмацняецца, паказвае, наколькі неацэнная праца кожнага чалавека ў белым халаце.

Падтрымаць добрым словам беларускіх урачоў, у тым ліку тых, якія працуюць у нашым рэгіёне, вырашылі і вучні 11 класаў хіміка-біялагічнага профілю Магілёўскага дзяржаўнага абласнога ліцэя № 3. Хлопцы і дзяўчаты ў будучым плануюць звязаць сваё жыццё з медыцынай і выдатна ведаюць, што сярод тых, хто сёння змагаецца з вірусам, ёсць выпускнікі іх альма-матар.

Паважаныя медыцынскія работнікі Магілёўшчыны і Рэспублікі Беларусь!

Мы, выпускнікі ліцэя, зусім хутка выйдзем на самастойную дарогу жыцця, і кожны з нас марыць быць урачом, звязаць свой лёс з медыцынай.

Сёння, калі зусім нядаўна людзі, якія заснулі ў адным свеце, а прачнуліся зусім у іншым, дзе смерць крочыць па планеце, дзе абдымкі і пацалункі з блізкімі табе людзьмі сталі зброяй, дзе адсутнасць кантактаў з бабулямі і дзядулямі ператварылася ў акт любові, многія пераасэнсоўваюць сваё жыццё.

А мы ўсё больш пераконваемся, што прафесія ўрача, медыцынскага работніка–самая неабходная ў свеце. І белы халат медыка нездарма з’яўляецца сімвалам надзеі, веры, дапамогі ў палягчэнні пакут.

Сёння ўсе медыцынскія работнікі знаходзяцца на перадавым краі барацьбы за жыццё на зямлі. Тое, што вы робіце для людзей, працуючы суткамі напралёт, немагчыма пераацаніць.

Мы ведаем, што ў гэтай бітве за жыццё вельмі шмат выпускнікоў хіміка-біялагічнага профілю нашага ліцэя. І мы ўпэўненыя, што яны–нашы сапраўдныя прафесіяналы сваёй справы. Памятайце пра тое, што былых ліцэістаў не бывае! Мы з вамі!

Мы выказваем усім урачам і медыцынскім работнікам Магілёўшчыны і Рэспублікі Беларусь, якія знаходзяцца ў зоне рызыкі, сваю велізарную павагу і сцвярджаем, што вышэй за такое ваша служэнне няма нічога! Нізкі паклон вам за падзвіжніцкую працу, за ваша добрае сэрца.

Дзякуй за вашу мужнасць і цярпенне.

Моцнага Вам здароўя! Беражыце сябе!

З вашай неацэннай дапамогай і ўсе разам мы пераможам COVID-19.

Але свет, напэўна, ужо стане іншым – як птушка Фенікс, уваскрослы з попелу…