Назараў аб бабруйскім «ФанДАКу»: у прадпрыемства ёсць усё неабходнае для атрымання максімальнай выгады

ААТ «ФанДАК» мае ўсё неабходнае для атрымання максімальнай выгады. Такім меркаваннем з журналістамі падзяліўся намеснік прэм’ер-міністра Юрый Назараў падчас наведвання бабруйскага прадпрыемства.

Юрый Назараў азнаёміўся з тэхналагічнымі працэсамі вытворчасці ДСП, фанеры і мэблі. Адным з перспектыўных напрамкаў для будучай працы віцэ-прэм’ер назваў мэблевы цэх. «Мэблевы цэх – гэта той цэх, на базе якога можна з невялікімі фінансавымі ўкладаннямі і за невялікі часавы адрэзак стварыць добрую і годную вытворчасць. Тым больш вытворчасць ужо сёння працуе – мэбля запатрабаваная. Адзінае, сёння разбяромся, чаму яно працуе ў адну змену: мы не можам больш прадаць ці не можам больш вырабляць. І вось гэта слабое месца трэба проста развязаць, – сказаў намеснік прэм’ер-міністра. – Дадаць сюды людзей, а гэта новыя працоўныя месцы. Практычна праз дарогу – лесатэхнічны каледж. І тут усё сыходзіцца: падрыхтоўка кадраў, аб’ём вытворчасці, адпаведныя магутнасці. Усё ёсць, каб атрымаць эфект. Як расказаў начальнік цэха, мэбля прадаецца з рэнтабельнасцю 18%. Добрая рэнтабельнасць, яе можна развіваць».

Пасля знаёмства з вытворчасцю адбылася нарада, дзе абмяркоўваліся далейшыя перспектывы развіцця ААТ «ФанДАК». Як адзначыў старшыня канцэрна «Беллеспаперпрам» Міхаіл Касько, ужо выпрацаваны тры напрамкі, па якіх плануецца развіваць дрэваапрацоўчае прадпрыемства ў Бабруйску. «Мы бачым тры напрамкі, якімі будзем займацца ў найбліжэйшы час. Асноўны – мэблевая вытворчасць, бо тут для гэтага ўсё ёсць: станкі, абсталяванне, кадры. Зусім побач знаходзіцца каледж, які выпускае годных спецыялістаў. Мэблевая вытворчасць працуе ў адну змену, частка мэбельшчыкаў – у дзве, а нам трэба запусціць яе ў тры змены. Адпаведна, трэба вырашыць пытанне кадраў, аптымізацыі тэхналагічнага ланцужка набыцця або перадачы нейкага абсталявання. Такім чынам, па мэблевай вытворчасці будзе яснасць», – падкрэсліў ён.

Яшчэ адзін напрамак – вытворчасць драўнянастружкавых пліт. «На жаль, ва ўмовах нізкіх цэн на іх эфектыўна працаваць вытворчасць не зможа, паколькі на невялікім адносна іншых заводаў, напрыклад, «Івацэвічдрэў» і «Рэчыцадрэў», аб’ёме вытворчасці прамыя выдаткі на вытворчасць ДСП не пакрываюцца цэнамі. Вырашылі падумаць, як частку абсталявання, якое задзейнічана ў вытворчасці ДСП-пліты, з адносна вялікімі інвестыцыямі задзейнічаць на вытворчасці іншай прадукцыі, напрыклад, драўняных пелет або брыкетаў. Тыя сушылкі, якія працуюць на ДСП, змаглі б працаваць і на другі паток», – адзначыў Міхаіл Касько.

У размове закранулі і вытворчасці фанеры. «ФанДАК» заўсёды славіўся высокай якасцю гэтай прадукцыі. Думаем, як павялічыць аб’ёмы вытворчасці. Ужо прыняты некаторыя пастановы. Неабходна ўсталяваць дадаткова сушыльнае абсталяванне, так на дзеючыя прэсы будзе пастаўляцца ўжо высушаны шпон. Тым самым можна будзе вырабляць да 3,5‑4 тыс. куб. м на год. Комплекс гэтых рашэнняў да канца наступнага года дасць нам магчымасць яшчэ больш палепшыць працу «ФанДАКа», – падсумаваў Міхаіл Касько.

ААТ «ФанДАК» вырабляе фанеру, корпусную мэблю, піламатэрыялы і іншую прадукцыю. Большую частку выпускаемых вырабаў – больш за 60% – складае фанера. Усе прадукцыя Бабруйскага дрэваапрацоўчага прадпрыемства рэалізуецца амаль у 40 краін. 90% гатовай мэблевай прадукцыі пастаўляецца на еўрапейскі рынак – у Германію, Данію, Балгарыю і іншыя краіны.

Акрамя гэтага, абмяркоўвалася неабходнасць стварыць праграму дзеянняў па ўключэнні ў абарот лісцянай драўніны. «Наспела неабходнасць падысці вельмі сур’ёзна да таго, каб стварыць пэўную праграму дзеянняў па ўключэнні ў абарот лісцянай драўніны: бярозы, асіны, шэрай алешыны. Сёння на прыкладзе магілёўскага рэгіёна паглядзім, як падысці да гэтага пытання комплексна: што тут расце, якая перапрацоўка ёсць, якія далейшыя кірункі. Не сакрэт: Магілёўскую вобласць мы разглядаем як адзін з магчымых варыянтаў для вытворчасці беленай тэрмамеханічнай масы. Гэта дазволіць нам вырабляць сыравіну для далейшай папяровай прамысловасці і ўцягнуць у абарот асінавую сыравіну», – адзначыў намеснік прэм’ер-міністра.

Другое прадпрыемства, якое наведала сёння дэлегацыя на чале з Юрыем Назаравым, – ЗАТ «Пінскдрэў-Бабруйск». Гэта вытворчасць стала прыкладам паспяховай мадэрнізацыі: тут скарацілі вытворчасць дарагой мэблі з масіву і пашырылі вытворчасць вырабаў з ДСП. «Пасля таго як у 2019 годзе «Пінскдрэў» набыў кантрольны пакет акцый, рэнтабельнасць тут была нулявая. Ужо ў 2020 годзе мы змаглі выйсці на прыбытковую вытворчасць і зарабілі свой першы мільён, – расказаў дырэктар ЗАТ «Пінскдрэў-Бабруйск» Уладзімір Маркушэўскі. – У 2022 годзе плануем павялічыць аб’ёмы вытворчасці на 33%. Зараз на прадпрыемстве працуе каля 430 чалавек. У 2019 годзе сярэдні ўзрост супрацоўнікаў складаў 55 гадоў, цяпер 45 гадоў».

«Ключавая задача, пастаўленая перад гэтым прадпрыемствам, выканана. Будучы уключаным у холдынг, пайшло інвеставанне ў вытворчасць, павялічылася сярэдняя заработная плата, што дало станоўчы эффект», – адзначыў намеснік прэм’ер-міністра.

Пасля знаёмства з вытворчасцю дэлегацыя наведала фірменны магазін, у якім прадстаўлена традыцыйная мэблевая прадукцыя і навінкі ЗАТ «Пінскдрэў».

БЕЛТА