Новую п’есу беларускага класіка Аляксея Дударава паставілі ў Магілёве

Новую п’есу класіка беларускай драматургіі, старшыню Беларускага саюза тэатральных дзеячаў Аляксея Дударава «Белыя крылы» паставілі ў Магілёўскім драматычным тэатры. Пастаноўку, жанр якой вызначаны як «псіхалагічны накцюрн», ажыццявіла галоўны рэжысёр тэатра Таццяна Пацай.

– Заўсёды прыемна, калі тое, што ты напісаў, знаходзіць нейкі водгук, – гаворыць Аляксей Дудараў, – калі напісаная табой п’еса атрымлівае сцэнічнае ўвасабленне. Цікава, што, як і ў выпадку са спектаклем «Сабака белага вострава», пастаўленым Святланай Навуменка ў новым драматычным тэатры і тэатры імя Я. Коласа у Віцебску, тут таксама рэжысёрам выступіла жанчына – галоўны рэжысёр магілёўскага тэатра Таццяна Пацай. У рэпетыцыйны працэс я ніколі не ўмешваюся. Але наогул у мяне сёння такое адчуванне, што ў Беларусі жаночая рэжысура і па мысленні, і па сваёй прадуктыўнасці, і па разнастайнасці прыёмаў і сцэнічнай мовы даўно апярэдзіла мужчынскую. Нашы мужчыны-рэжысёры схавалі галаву ў пясок.

Анатацыя да спектакля на сайце тэатра інтрыгуе: «Галоўны герой спектакля прафесар Пётр сутыкнуўся з крызісам сярэдняга ўзросту. Бестурботная маладосць праляцела, шчаслівы шлюб разваліўся. Як знайсці гармонію ў жыцці? І толькі маладая дзяўчына трымае прафесара на плаву. Захоўвае для яго камфорт. Яна паслужлівая, мілая, таварыская. І здаецца, абсалютна ідэальная. Але што, калі за яе прыемнай дабрадзейнасцю хаваецца нешта іншае? Што, калі дзяўчына, падобна міфічнай сірэне, выконвае накцюрн не дзеля выратавання, а для прываблівання ў небяспечную пастку, выбрацца з якой будзе нялёгка?!»

У прэм’ерным спектаклі «Белыя крылы» заняты вядучыя акцёры трупы: Галіна Лабанок, Дзмітрый Дудкевіч, Мікалай Раманоўскі, Ангеліна Цімаховіч, Амалія Старавойтава.

Прэм’ера «псіхалагічнага накцюрна» «Белыя крылы» пройдзе на Малой сцэне Магілёўскага драматычнага тэатра 19 красавіка а 18:30.

СБ