Новы, цалкам электрыфікаваны дзіцячы сад «Жамчужынка» адкрыўся ў Шклове

У Шклове ўрачыста адкрылі новы, цалкам электрыфікаваны дзіцячы сад «Жамчужынка». Установа дашкольнай адукацыі, разлічаная на 50 дзяцей, размясцілася на вул. Маладзёжнай у новым мікрараёне.

«Напярэдадні Міжнароднага дня абароны дзяцей у рэгіёне адкрываюцца два вельмі важныя і значныя сацыяльныя аб’екты – дзіцячы сад у Шклове і дзіцячая паліклініка ў Магілёве, – расказаў намеснік старшыні Магілёўскага аблвыканкама Валерый Малашка. – Абедзве гэтыя ўстановы былі доўгачаканымі, паколькі размяшчаюцца ў густанаселеных раёнах: там, дзе высокая патрэба ў медыцынскай дапамозе і выхаваўчых паслугах. Важна, што гэта сучасныя аб’екты з найноўшым абсталяваннем: і медыцынскі кабінет, і харчаблок, і дзіцячыя пакоі. Усё зроблена для таго, каб нашы дзеці гарманічна развіваліся фізічна і духоўна, былі сапраўднымі грамадзянамі і патрыётамі».

Праект дзіцячага садка рэалізаваны ў адпаведнасці з абласной інвестыцыйнай праграмай, на будаўніцтва выдзелена амаль Br2,5 млн. Дзіцячы сад размясціўся ў новым мікрараёне побач з заводам газетнай паперы. У райвыканкаме адзначылі, што гэты сацыяльны аб’ект тут быў жыццёва неабходны: некалькі гадоў таму на тэрыторыі мікрараёна пабудаваны шматкватэрныя дамы для шматдзетных сем’яў. У далейшым тут з’явяцца яшчэ тры шматпавярхоўкі, пашырыцца неабходная інфраструктура.

Па словах старшыні Шклоўскага райвыканкама Андрэя Камко, «Жамчужынка» – першы ў горадзе сад такога ўзроўню. Яго пабудавалі дзякуючы падтрымцы Прэзідэнта па ініцыятыве мясцовых жыхароў. Усяго ў раённым цэнтры дзейнічае 8 устаноў дашкольнай адукацыі. «Новы дзіцячы сад стане сапраўднай жамчужынай гэтага мікрараёна – прыгожы, камфортны, сучасны, – адзначыў ён. – Адкрыццё аб’екта важнае і патрэбнае, гэта сапраўдная падзея для мясцовых жыхароў, у першую чаргу для маладых сем’яў з дзецьмі».

«Ва ўстанове будуць функцыянаваць тры рознаўзроставыя групы для дзяцей ад 3 да 7 гадоў, аднак ужо з верасня іх плануецца разбіць на малодшую, сярэднюю і старэйшую, – расказала загадчыца ўстановы дашкольнай адукацыі Вольга Прохарава. – Групавыя памяшканні абсталяваны асобнымі ўваходамі з прыладай падвойнага тамбура, што вельмі зручна: з распранальняў дзеці адразу выходзяць на прагулачныя пляцоўкі. Акрамя таго, тамбур адыгрывае ролю своеасаблівага цеплавога шлюза. Ізаляванне груп прадугледжана ў ліку іншага ў супрацьэпідэмічных мэтах, а таксама згодна з нормамі супрацьпажарнай бяспекі».

Новы сацыяльны аб’ект цалкам электрыфікаваны – ад падачы гарачай вады да ацяплення. На час асенне-зімовага перыяду для абагравання памяшканняў будуць выкарыстоўвацца цеплаканвектары. Падлога з падагрэвам, каб дзецям было цёпла і камфортна. У кожнай прыёмнай-распранальні, акрамя індывідуальных шафак, устаноўлены электрычныя – для прасушвання адзення і абутку дзяцей.

Светлыя і прасторныя групы падзелены на гульнявое, спальнае і туалетнае памяшканне, маюцца буфетная і рэсурсная. У спальных і групавых устаноўлены паветраводы, ёсць рэцыркулятары для ачышчэння і іанізацыі паветра. Выключальнікі і разеткі размешчаны на недасягальным для дзяцей узроўні – усё ў мэтах бяспекі. З распранальні і спальні прадугледжаны па два эвакуацыйныя выхады, добраўпарадкавана безбар’ернае асяроддзе, устаноўлена яркая і зручная перагародкавая мэбля. За кожнай групай замацаваны асобны ўчастак з сучасным спартыўным і гульнявым абсталяваннем.

У садзе ёсць музычна-фізкультурная зала, кабінет настаўніка-дэфектолага, адведзены асобны медыцынскі кабінет і ізалятар, абсталяваны ў ліку іншага абеззаражвальнікам паветра. У харчаблок увайшлі агароднінны, нарыхтовачны і гарачы цэхі, камора сухіх прадуктаў, мыйная. Тэхнічнае абсталяванне таксама на ўзроўні – халадзільныя камеры, маразільныя лары, пліты, параканвектамат, бульбаачышчальная машына, электрамясорубка, агароднінарэзка для сырой гародніны.

Мясцовая жыхарка Алена Шаўцова павядзе ў новы сад 4-гадовую Ангеліну. Маладую маму радуе, што ёсць такая магчымасць: па-першае, сад размешчаны блізка да дома, па-другое, тут створаны добрыя ўмовы для знаходжання дзяцей – ад гульнявога абсталявання, зручнай мэблі да ўладкавання вулічных пляцовак. «Будзем хадзіць і радавацца!» – сказала Алена.

У дзень адкрыцця не абышлося без падарункаў. Загадчыцай установы дашкольнай адукацыі разам з сімвалічным ключом ад дзіцячага садка перададзены сертыфікаты ад Магілёўскага абласнога выканаўчага камітэта на Br10 тыс. на ўмацаванне матэрыяльна-тэхнічнай базы, а таксама ад Шклоўскага райвыканкама – на Br5 тыс. на набыццё гульнявога абсталявання.

БЕЛТА