Новы ўчастак ААТ «Магатэкс» у Чэрыкаве дазволіць стварыць да 70 працоўных месцаў

За кадрамі - у глыбінку

Прадпрыемства-гігант у тэкстыльнай галіне «Магатэкс» пашырае сваю прысутнасць у рэгіёнах. Галоўны аргумент такога рашэння - кадравы. Выгада ўзаемная: магілёўскае прадпрыемства атрымлівае працоўныя рэсурсы, а жыхары раёна - новыя працоўныя месцы. У невялікім Чэрыкаве навіна аб адкрыцці вытворчасці разляцелася адразу ж. Тым больш што пры прыёме на працу наяўнасць кваліфікацыі швачкі вітаецца, але гатовы навучыць і з нуля.

Лілія В'юнік прыязджае ў Чэрыкаў кожную раніцу на рэйсавым аўтобусе з аграгарадка Язёры. Дзяўчына па адукацыі аграном, але пасля адпрацоўкі вырашыла памяняць род дзейнасці:

- Шчыра кажучы, шыць не ўмела, усяго два тыдні вывучаю асновы з інструктарам вытворчага навучання. Але мне вельмі падабаецца, збіраюся купіць дадому швейную машынку. Цяпер працую вучнем, а здам іспыты - атрымаю кваліфікацыю швачкі.

Мама траіх дзяцей Ангеліна Ісачанка ў дэкрэтным адпачынку, працуе на паўстаўцы. У жанчыны таксама не было кваліфікацыі швачкі, па спецыяльнасці яна маляр-тынкоўшчык:

- Пакуль знаходжуся ў дэкрэтным, вырашыла скарыстацца магчымасцю паспрабаваць сябе ў нечым новым. Вельмі добра, што ў нас адкрылася гэтая вытворчасць. У нашым райцэнтры з прадпрыемстваў па вялікім рахунку лясгас і «Жылкамгас» - там вакансіі ў асноўным для мужчын. А тут сказалі, да 70 швачак гатовы набраць і навучыць, калі трэба.

Начальнікам швейнага ўчастка стала былая выхавацелька Таццяна Новікава, якая 16 гадоў прапрацавала ў дзіцячым садку:

- Я шыць любіла заўсёды. Калі пачула пра планы адкрыць новае прадпрыемства, ужо бачыла сябе ў ролі швачкі. Але на сумоўі мне прапанавалі паспрабаваць у кіруючай пасадзе. Прайшла навучанне ў ААТ «Магатэкс» у Магілёве, трэба было асвоіць дакументазварот, зразумець, як фармуецца заробак, вядзецца ўлік працоўнага часу. Думаю, усё атрымаецца.

Развіваць эканоміку рэгіёнаў, ствараць працоўныя месцы з годным узроўнем зарплаты - гэта і ёсць галоўная задача мясцовай улады, на якую арыентуе Прэзідэнт, падкрэслівае намеснік старшыні па эканоміцы Чэрыкаўскага райвыканкама Алена Сляпцова:

- У наступным годзе запусцім комплекс па вытворчасці ікры стронгі па праграме «Адзін раён – адзін праект», створым не менш за 20 новых працоўных месцаў. Ужо падрыхтаваны горадабудаўнічы пашпарт на будаўніцтва дата-цэнтра для майнінгу з кітайскімі інвестыцыямі, дзе таксама запланавана два дзясяткі працоўных месцаў. Перспектыўнымі бізнес-праектамі ў нашым раёне могуць стаць аб'ект прыдарожнага сэрвісу ў сувязі з будаўніцтвам чатырохпалоскі па трасе Р-122, а таксама здабыча мінеральнай вады са свідравіны з гатовым горадабудаўнічым пашпартам. Дарэчы, Указам Прэзідэнта «Аб сацыяльна-эканамічным развіцці паўднёва-ўсходняга рэгіёну Магілёўскай вобласці» ў нашым раёне прадастаўляецца шэраг ільгот для інвестараў. Імі на сёння скарысталіся дзве арганізацыі.

ПРАМАЯ МОВА

Дырэктар швейнай фабрыкі ААТ «Магатэкс» Алена Сіліна:

- Штомесяц прадпрыемства вырабляе 2,3 мільёна пагонных метраў тканіны. Многія кліенты хочуць атрымаць адразу гатовы прадукт, ды і мы зацікаўлены ў павелічэнні аб'ёму таварнай прадукцыі з дабаўленай вартасцю. Аднак лёгкая прамысловасць ва ўсім свеце зараз сутыкнулася з праблемай дэфіцыту кадраў. Таму сваю кадравую стратэгію выбудоўваем так, каб ствараць вытворчыя пляцоўкі ў райцэнтрах. У нас ужо дзейнічае швейны ўчастак у Быхаве з агульнай колькасцю амаль 90 працаўнікоў, швейныя пляцоўкі ў Кобрыне і Полацку. Час паказаў, што гэта апраўдана, эфектыўна.

СБ