Новыя імёны і скульптура ўпрыгожылі сцежку фестывалю «Вялікая бард-рыбалка»

Новыя імёны выканаўцаў аўтарскай песні і незвычайная скульптура ўпрыгожылі сімвалічную бард-сцежку фестывалю «Вялікая бард-рыбалка».

Закладка імянных валуноў у бард-сцежку - адна з традыцый фестывалю. Сёлета яна папоўнілася імёнамі расійскага барда Сяргея Мацвеенкі і мінчаніна Сяргея Панамарова. Але гасцей і ўдзельнікаў фестывалю чакаў сюрпрыз. Сёлета сцежку ўпрыгожыла скульптура мужчыны ў цяльняшцы з гітарай і русалкай у руках. Аўтарам твора з граніту стаў магілёўскі скульптар Аляксандр Мінькоў.

Выраб скульптуры заняў у майстра каля двух тыдняў. Аляксандр Мінькоў падзяліўся, што гэтай скульптурай хацеў зрабіць падарунак такому яркаму летняму святу.

Як расказаў адзін з арганізатараў свята Сяргей Кулягін, кожны год фестываль атрымлівае абнаўленні, захоўваючы пры гэтым свае лепшыя традыцыі. «У гэтым годзе ў нас шмат цікавых выканаўцаў новага пакалення, сярод якіх вядомая расійская выканаўца кантры Ірына Сурына, - распавёў ён. - Мы ўчора прэзентавалі ў Магілёве, а ў суботу на галоўнай сцэне загучыць новы праект для Беларусі «Песні нашага круга» з залатога фонду аўтарскіх песень нашай краіны. Мы захавалі ўсе нашыя праекты і конкурсы. У гэтым годзе будзе вялікая канкурэнцыя на конкурсе «Каралева бард-рыбалкі» - ужо выбудоўваецца чарга. Надвор'е спрыяе нашаму святу».

Фестываль стартаваў сёння на беразе Чыгірынскага вадасховішча, на тэрыторыі базы адпачынку Магілёўскага металургічнага завода «Чачэвічы». Праграма свята разлічана на тры дні. У гэтым годзе ўдзельнікамі фестывалю стануць 50 бардаў з Беларусі, Расіі і Латвіі. «Вялікая бард-рыбалка» будзе гучаць з 28 па 30 ліпеня.

БЕЛТА