Падтрымка сялянскай гаспадаркі, вырашэнне зямельнай спрэчкі. Ісачанка правёў прыём грамадзян у Магілёве

Старшыня Магілёўскага аблвыканкама Анатоль Ісачанка правёў прыём грамадзян у Магілёве. Да кіраўніка рэгіёна звярнуліся заяўнікі з Бабруйска, Круглага і Магілёўскага раёна.

Жыхар в. Чаромшкі папрасіў садзейнічання ў старшыні аблвыканкама ў вырашэнні зямельнай спрэчкі з сумежным землекарыстальнікам. Паміж суседзямі ў 2022 годзе ўсталяваныя новыя межы зямельных участкаў, пасля чаго плошча надзелу заяўніка склала 18,9 сотак замест ранейшых 20. Пенсіянер не пагадзіўся з такім рашэннем і ініцыяваў шэраг зваротаў - спачатку да мясцовай выканаўчай улады, потым у суд. Раённы і абласны суд пакінулі прынятае рашэнне без змен, зараз чакаецца вердыкт Вярхоўнага Суда, які пераглядае справу. Анатоль Ісачэнка падкрэсліў, што згодна з дзейным заканадаўствам рашэнне апошняй інстанцыі будзе прынята да выканання.

Да старшыні аблвыканкама па дапамогу і падтрымку звярнуўся кіраўнік сялянска-фермерскай гаспадаркі, якая займаецца развядзеннем авечак у Круглянскім раёне. Сёння тут змяшчаецца каля 700 галоў жывёлы, у тым ліку пяць соцень авечкаматак. У сувязі з ростам пагалоўя фермер сутыкнуўся з шэрагам праблем, якія патрабуюць удзелу выканаўчай улады. Так, заяўнік прасіў павялічыць зямельны надзел для ўтрымання і адкорму жывёл, аказаць садзейнічанне ў фінансаванні будаўніцтва забойнага цэха на тэрыторыі гаспадаркі, выдзеліць драўніну на льготных умовах для рамонту фермы і будаўніцтва агародж для авечак.

Старшыня аблвыканкама падкрэсліў: калі чалавек працуе і развіваецца на карысць рэгіёна, трэба яго падтрымаць і аказаць адпаведную дапамогу. Райвыканкам ужо зараз гатовы выдзеліць фермеру 200 куб.м драўніны на тэрыторыі Бялыніцкага лясгаса, а пасля праверкі іх мэтавага выкарыстання даць дадатковую драўніну. Камітэтам эканомікі аблвыканкама будзе прапрацавана пытанне па будаўніцтве забойнага цэха, у тым ліку разгледжаны і прапанаваны ўсе варыянты па фінансаванні і крэдытаванні гэтага праекта. У наступным годзе вырашыцца пытанне і з зямлёй, якая вызваліцца пасля меліярацыйнай рэканструкцыі.

Заяўнікі з Бабруйска хадайнічалі аб выдзяленні фінансавання на будаўніцтва размеркавальных сетак каналізацыі прыватнага жылога сектара, размешчанага на тэрыторыі горада. Старшыня аблвыканкама даручыў дэталёва разабрацца ў сітуацыі і растлумачыў, што ў першую чаргу работы будуць весціся на аварыйных участках магістральных сетак каналізацыі, таму вырашэнне пытання будзе на час адкладзена. Тым больш у гэтым годзе запланаваны вялікія аб'ёмы па будаўніцтве і рэканструкцыі сетак ва ўсіх кутках рэгіёну, абласны бюджэт сфарміраваны і не дазваляе перанакіроўваць буйныя сумы на новыя аб'екты. Анатоль Ісачанка паабяцаў заяўнікам даць адказ пасля прадметнага вывучэння пытання на месцах.

БЕЛТА