Паказаць свае працы і ўбачыць новыя напрамкі творчасці. Расійская майстрыха пра «Купалле» ў Александрыі

Такія святы, як «Купалле», збліжаюць людзей. Гэта ў гутарцы падчас рэспубліканскага свята «Купалле» («Александрыя збірае сяброў») адзначыла майстрыха з Ленінградскай вобласці Таццяна Сяргеева.

Майстрыха ў Беларусі першы раз. І, як падкрэсліла яна, ёй пашанцавала пачаць сваё знаёмства з такой дзіўнай краінай менавіта з «Купаля».

«Мы прыехалі сюды дэлегацыяй майстрых дэкаратыўна-прыкладной творчасці. Прывезлі з сабой тканыя вепскія дарожкі, пано з арнаментамі, галаўныя ўборы і, вядома ж, нашы лялькі-абярэгі, - распавяла яна. - Нас выдатна сустрэла александрыйская зямля. Сонечнае надвор'е, вельмі добрыя людзі, надзвычайны маштаб свята - я рада знаходзіцца тут сёння».

Такія фестывалі, упэўнена расіянка, ніколі не страчваюць сваёй актуальнасці. «Яны збліжаюць людзей усіх: людзей розных нацыянальнасцяў, старых і новых сяброў, жыхароў розных краін. Яны робяць нас дабрэйшымі, шчаслівымі і мацнейшымі», - дадала Таццяна Сяргеева.

Вялікую каштоўнасць «Купалле» мае для майстроў. Бо для іх гэта не толькі магчымасць паказаць свае працы, але і пазнаёміцца з зусім новымі напрамкамі творчасці. «З любога фестывалю, з кожнага новага знаёмства мы атрымліваем нешта новае для сябе і сваёй творчасці. І гэты ўзаемны абмен вельмі важны для ўзбагачэння кожнага майстра, нашых культур у цэлым», - склала яна.

Рэспубліканскае свята «Купалле» («Александрыя збірае сяброў») 16-ы раз праходзіць у Шклоўскім раёне. Па традыцыі гэты фестываль аб'яднаў дзясяткі тысяч чалавек на маляўнічым беразе Дняпра. Гулянні сёння працягнуцца да самай ночы.

БЕЛТА