Старшыня Магілёўскага аблвыканкама Анатоль Ісачанка сустрэўся сёння з Надзвычайным і Паўнамоцным Паслом Рэспублікі Казахстан у Рэспубліцы Беларусь Ерланам Байжанавым. Таксама ў сустрэчы прыняў удзел памочнік Прэзідэнта - інспектар па Магілёўскай вобласці Леанід Мартынюк.
Анатоль Ісачанка прывітаў гасцей і падзякаваў за візіт, адзначыўшы, што нашы краіны ўжо больш як 30 гадоў звязваюць дыпламатычныя адносіны: склаліся міжрэгіянальныя, эканамічныя, культурныя сувязі.
Па аб'ёме беларускага экспарту Казахстан уваходзіць у дзясятку асноўных гандлёвых партнёраў Рэспублікі Беларусь. Надае важнае значэнне развіццю двухбаковых адносін і Магілёўская вобласць. Для Прыдняпроўскага края Казахстан з'яўляецца адным з найважнейшых эканамічных партнёраў і займае другое месца ў знешнегандлёвым абароце і экспарце сярод краін Еўразійскага эканамічнага саюза. Асноўныя артыкулы экспарту ў Казахстан - гэта шыны, малочная прадукцыя, мяса птушкі, ліфты, запчасткі для аўтамабіляў і трактароў, помпы, пліты ДСП. Нашы прадпрыемствы закупляюць у Казахстане баваўняную пражу і іншыя тавары. За апошнія некалькі гадоў адзначаецца дадатная дынаміка знешняга гандлю Магілёўскай вобласці і Казахстана.
«Так, з 2019 года аб'ём знешняга гандлю вырас у 1,5 разы з $44,8 млн да $69,0 млн у 2022 годзе. Але я лічу, што гэтага нядосыць і ў нас ёсць вялікія магчымасці для таго, каб павялічыць гэтыя лічбы. Гэта патрэбна для нашых людзей, ад гэтага залежыць рост даходаў насельніцтва. Таму будзем працаваць у гэтым напрамку, - адзначыў Анатоль Ісачэнка. - У бягучым годзе адзначаецца нязначнае зніжэнне тэмпаў росту экспартна-імпартных аперацый. Але асноўная прычына - значнае зніжэнне сусветных экспартных цэн. Аднак варта адзначыць, што ў натуральным выражэнні адзначаецца рост экспартных паставак. Гэта сведчыць аб тым, што прадпрыемствы Магілёўскай вобласці зацікаўлены ў далейшым нарошчванні аб'ёмаў экспарту ў Казахстан.
Напрыклад, для «Магілёўліфтмаша» казахстанскі рынак з'яўляецца адным з асноўных рынкаў збыту. Там функцыянуюць два зборачныя прадпрыемствы – у гарадах Актабе і Алматы.
З пачатку 2023 года ў Рэспубліку Казахстан пастаўлена 346 адзінак ліфтаў. Але мы бачым, што экспартны патэнцыял нашмат большы і сёння прадпрыемства гатова больш актыўна ўдзельнічаць у праграме па замене ліфтаў у розных рэгіёнах Рэспублікі Казахстан, а таксама пастаўляць ліфты для новага будаўніцтва».
Губернатар Магілёўскай вобласці адзначыў, што прадстаўнікі Казахстана, асабіста наведаўшы гэта прадпрыемства, азнаёміўшыся з лінейкай прадукцыі ўжо больш дэталёва змогуць весці перагаворы па пашырэнні ўзаемавыгаднага супрацоўніцтва.
«Гатова да далейшага супрацоўніцтва і бабруйская «Белшына». У бягучым годзе, нягледзячы на падзенне экспартных цэн на шыны больш як у два разы, прадпрыемствам у Казахстан пастаўлена на 51 тысячу адзінак прадукцыі больш, чым у мінулым годзе, - прывёў лічбы Анатоль Ісачэнка. - Да таго ж, у Казахстане ў «Белшыны» дзейнічае ўласны суб'ект тавараправоднай сеткі - таварыства з абмежаванай адказнасцю «Беларуская шына». Такім чынам, казахстанскі спажывец можа набыць шыны для кар'ерных самазвалаў і іншай спецтэхнікі як напрамую ў вытворцы, так і ў афіцыйнага дылера. У пытанні коштаўтварэння важна выключаць пасрэднікаў».
Закранулі бакі і тэму сельскай гаспадаркі, адзначыўшы цікавасць у нарошчванні паставак сельскагаспадарчай тэхнікі, прадуктаў харчавання, партнёрстве з шэрагам прадпрыемстваў: «Для супрацоўніцтва лепшае – гэта прамое наведванне. Важна, каб прадстаўнікі бізнес-супольнасці выязджалі і на месцах спецыялісты па канкрэтных напрамках абменьваліся думкамі і прымалі ўзаемавыгадныя рашэнні. Мы ў сваю чаргу гатовы прыняць любыя бізнес-дэлегацыі, каб прадэманстраваць нашы магчымасці. Заўсёды адкрыты да дыялогу і гатовы падзяліцца вопытам, - падкрэсліў кіраўнік Прыдняпроўскага краю. - Будзем рады бачыць прадстаўнікоў Казахстана на Міжнародным эканамічным форуме «Млын поспеху», які плануецца правесці восенню 2024 года!».
Таксама Анатоль Ісачанка запрасіў гасцей у наступным годзе прыняць удзел у шэрагу фестываляў і пленэраў Магілёўшчыны, у іх ліку - рэспубліканскае свята «Купалле» («Александрыя збірае сяброў»). Адзначыў ён і значнасць патрыятычнага выхавання моладзі, прапанаваўшы хлопцам з Казахстана прыняць удзел у міжнародным праекце «Дарогамі Памяці і Славы»: «Мы павінны рабіць усё, каб маладыя людзі разумелі адзін аднаго, размаўлялі як мага больш і часцей і не забывалі сваю гісторыю».
Падводзячы вынік сустрэчы, старшыня аблвыканкама выказаў упэўненасць, што сустрэча паслужыць пашырэнню і ўмацаванню ўзаемавыгадных адносін паміж Магілёўскай вобласцю і Рэспублікай Казахстан:
«Міжрэгіянальнае супрацоўніцтва - гэта аснова, база для далейшага прасоўвання. Таму што людзі сустракаюцца і размаўляюць непасрэдна напрамую, абмяркоўваюць пытанні, якія іх хвалююць і прымаюцца рашэнні, якія знаходзяць далейшае ажыццяўленне. Паглыбленне нашага ўзаемадзеяння - гэта чарговы віток для развіцця. Сёння, сустракаючыся з паслом Рэспублікі Казахстан, мы абгаварылі пытанні ўмацавання адносін. Асабліва гэта важна ў святле тых падзей, якія адбываюцца ў свеце.
У бліжэйшы час мы абмяняемся дэлегацыямі бізнес-супольнасці па розных напрамках, з іншымі структурамі і гэта надасць новы імпульс у прасоўванні нашых адносін», – рэзюмаваў Анатоль Ісачанка.
Ерлан Байжанаў падтрымаў прапановы кіраўніка Прыдняпроўскага краю: «Мы абмеркавалі важныя пытанні супрацоўніцтва, як на нацыянальным узроўні, так і рэгіянальным. І бачым вялікія перспектывы для паглыблення супрацоўніцтва з Рэспублікай Беларусь ва ўсіх кірунках. Безумоўна, рэгіянальнае супрацоўніцтва вельмі важнае. Так, раней Магілёўская вобласць падпісала пагадненне аб супрацоўніцтве з дзвюма абласцямі Казахстана - Усходне-Казахстанскай і Туркестанскай. І мы нацэлены надаць ім новы імпульс. Гэтыя вобласці па сваім профілі вельмі падыходзяць адзін аднаму.
Наведаўшы магілёўскія прадпрыемствы, мы бачым галоўнае. У тэхналагічных адносінах беларуская прамысловасць развіваецца вельмі добра, а прадукцыя не ўступае сусветным аналагам. Для Казахстана важна паглыбляць супрацоўніцтва не толькі ў гандлі, але і ў інвестыцыях. Будзем радыя бачыць перадавыя беларускія кампаніі ў нас. Таксама вельмі важна развіваць прамысловую кааперацыю - з гэтай мэтай я тут і настроены аптымістычна».
У рамках двухдзённага візіту прадстаўнікі Казахстана наведалі прадпрыемствы «Бабулін гладыш», «Магілёўліфтмаш», «Магатэкс», «Ноўус Індустры», а таксама СЭЗ «Магілёў». Адбыўся шэраг перамоваў.
Юлія Таранава, фота Галіны Гаўрыловіч
