Паступіць у БДУТ без іспытаў змогуць выпускнікі інжынерных класаў

Сёлета выпускнікі інжынерных класаў змогуць паступіць у Беларускі дзяржаўны ўніверсітэт харчовых і хімічных тэхналогій без экзаменаў. Аб гэтым расказалі ў ВНУ.

«Падрыхтоўцы інжынерных кадраў, у тым ліку для харчовай перапрацоўчай і хімічнай галін рэальнага сектара эканомікі, удзяляецца вялікая ўвага. Бо, па сутнасці, інжынер з'яўляецца рухаючай сілай на любым прадпрыемстве, - адзначылі ва ўніверсітэце. - У гэтым годзе па ўсёй краіне адбудзецца першы выпуск навучэнцаў устаноў агульнай сярэдняй адукацыі, якія навучаліся ў профільных класах інжынернай накіраванасці. Перавагай для іх з'яўляецца тое, што ў будучую прыёмную кампанію яны маюць права паступлення ва ўніверсітэты па ўсёй краіне без уступных іспытаў на шэраг запатрабаваных інжынерных спецыяльнасцей па выніках сумоўя».

Каб паступіць у БДУТ, выкарыстоўваючы дадзеную прэферэнцыю, абітурыенту-выпускніку профільнага класа інжынернай накіраванасці неабходна выканаць шэраг умоў. Сярод іх - адзнакі не ніжэйшыя за 8 балаў па прадметах профільных выпрабаванняў; мець у атэстаце адзнакі не ніжэйшыя за 7 балаў па астатніх прадметах; атрымаць рэкамендацыю педагагічнага савета школы і паспяхова прайсці сумоўе ў ВНУ.

У Беларускім дзяржаўным універсітэце харчовых і хімічных тэхналогій выпускнікам інжынерных класаў прапануюць паступіць на наступныя спецыяльнасці: прыродаахоўная дзейнасць; аўтаматызацыя тэхналагічных працэсаў і вытворчасцей; абсталяванне і тэхналогіі вакуумнай, кампрэсарнай і нізкатэмпературнай тэхнікі; вытворчасць прадуктаў харчавання з расліннай сыравіны (прафілізацыі: тэхналогія хлебабулачных і кандытарскіх вырабаў, тэхналогія брадзільных вытворчасцей і вінаробства); вытворчасць прадуктаў харчавання з жывёльнай сыравіны (прафілізацыі: тэхналогія малака і малочных прадуктаў, тэхналогія мяса і мясных прадуктаў); вытворчасць прадукцыі і арганізацыя грамадскага харчавання; вытворчасць і перапрацоўка палімерных матэрыялаў.

БЕЛТА