Пазнаёміць з прыгажосцю і гісторыяй краю. У Мсціслаўскім раёне з'явіўся новы экавеламаршрут

У Мсціслаўскім раёне з'явіўся новы экавеламаршрут па помніках прыроды. Пра гэта расказаў загадчык сектара спорту і турызму райвыканкама Руслан Трубянкоў.

Паводле слоў Руслана Трубянкова, у раёне надаюць асаблівую ўвагу развіццю турызму. А з'яўленне новых экалагічных маршрутаў дазваляе не толькі пазнаёміць людзей з прыгажосцю і гісторыяй краю, але і далучыць іх да здаровага ладу жыцця. Маршрут уключае чатыры прыродныя аб'екты. Яго агульная працягласць 12 км.

«Новы экавеламаршрут падыдзе для аматараў веласпорту і актыўных турыстаў. Ён уключае наведванне Кагальнага калодзежа, Чорнага ручая, дубровы «Лютня» і крыніцы «Белкава». Велатурысты будуць падарожнічаць з экскурсаводам, які азнаёміць іх з гісторыяй гэтых месцаў», - адзначыў Руслан Трубянкоў.

Каб праехаць па маршруце маглі ўсе жадаючыя незалежна ад наяўнасці ў іх веласіпедаў, закупілі 10 веласіпедаў, якія можна арандаваць.

Як адзначыў загадчык сектара спорту і турызму, распрацоўкай новага веламаршруту займаліся ЦФАР «Алімп» і раённая інспекцыя прыродных рэсурсаў і аховы навакольнага асяроддзя. «Маршрут будзе цікавым і жывапісным. Справіцца з ім змогуць і аматары веласпорту-пачаткоўцы. Наша задача была пракласці яго так, каб турысты правялі час на свежым паветры, нацешыліся прыгажосцю навакольнай прыроды, даведаліся крыху больш пра гісторыю Мсціслаўскага раёна», - падсумаваў ён.

БЕЛТА