Пераможцаў гарадскога конкурсу дзіцячай творчасці «Звонкая капель» назавуць у Магілёве 1 чэрвеня

Пераможцаў гарадскога конкурсу дзіцячай творчасці «Звонкая капель» абвесцяць падчас гала-канцэрта ў Магілёве 1 чэрвеня.

Сёлета прафесіяналам трэба было вызначыць пераможцаў у 10 намінацыях і дзвюх узроставых групах: 6–11 гадоў і 12–16 гадоў. Конкурсныя праслухоўванні праходзілі ва УК «Магілёўскі гарадскі Цэнтр культуры і вольнага часу». У іх прынялі ўдзел калектывы і індывідуальныя выканаўцы, аматарскія аб’яднанні і клубы па інтарэсах клубных устаноў, устаноў агульнай сярэдняй і дадатковай адукацыі дзяцей і моладзі. Члены журы ацэньвалі ўзровень выканальніцкага майстэрства, сцэнічную культуру і індывідуальнасць, складанасць абранага рэпертуару і мастацкі ўзровень твораў, а таксама арыгінальнасць творчай пастаноўкі нумароў і выканання работ.

У Дзень абароны дзяцей у скверы 40-годдзя Перамогі (з 14.00 да 16.30) пад шум фантанаў, усмешкі і гучныя апладысменты пройдзе гала-канцэрт агляду-конкурсу, падчас якога і будуць названыя імёны пераможцаў, а таксама ўручаны дыпломы і каштоўныя падарункі.

Арганізатарамі конкурсу выступаюць Магілёўскі гарадскі выканаўчы камітэт, упраўленне культуры Магілёўскага гарвыканкама і Магілёўскі гарадскі Цэнтр культуры і вольнага часу.

Рэд.