Першы ўрок у школах Беларусі ў Дзень ведаў будзе прысвечаны гістарычнай памяці

Першы ўрок у школах Беларусі ў Дзень ведаў пройдзе на адзіную тэму «Гістарычная памяць – дарога ў будучыню». Пра гэта паведаміла начальнік упраўлення агульнай сярэдняй адукацыі Міністэрства адукацыі Ірына Каржова на прэс-канферэнцыі «Аб праверцы і гатоўнасці адукацыйных устаноў Беларусі да новага навучальнага года».

«Першы ўрок у школах пройдзе на адзіную тэму «Гістарычная памяць – дарога ў будучыню». Таксама 1 верасня ва ўсіх школах адбудуцца святочныя мерапрыемствы, урачыстыя лінейкі, куды ў якасці гасцей запрошаны кіраўнікі рэспубліканскіх міністэрстваў і ведамстваў. Таму мы ўпэўнены, што свята адбудзецца і Дзень ведаў пройдзе высокаарганізавана», – расказала Ірына Каржова.

Яна дадала, што асаблівая ўвага ў гэтым навучальным годзе, як і ў папярэднім, надаецца выхаваўчаму патэнцыялу ўрока. «Мы кажам, што кожны ўрок павінен не толькі несці веды па сваім прадмеце, але і выхоўваць навучэнцаў магчымасцямі канкрэтнага ўрока. Для гэтага Міністэрства адукацыі дае адпаведныя рэкамендацыі па асвятленні тых ці іншых тэм, напрыклад, у інструктыўна-метадычных лістах ёсць рэкамендацыі па асвятленні тэмы генацыду беларускага народа ў межах выкладання вучэбных прадметаў», – адзначыла начальнік упраўлення.

Ірына Каржова нагадала, што ў 2021/22 навучальным годзе завяршыўся пераход на абноўленыя навучальныя праграмы, які ажыццяўляўся паэтапна з 2015 года. «Таму ў 2022/23 навучальным годзе ніякіх карэнных змен у праграмах не адбудзецца. Навучальныя праграмы змяняліся з улікам прапаноў, якія паступалі ад педагогаў-практыкаў. Акрамя таго, яны зведалі змены ў сувязі з прыняццем новай рэдакцыі Канстытуцыі Беларусі, а таксама з улікам змяненняў у тыпавым навучальным плане. Навучальныя праграмы, як і ўся нарматыўная прававая база, размешчаны на сайце Міністэрства адукацыі», – падкрэсліла яна.

Пад новыя навучальныя праграмы абноўленыя і падручнікі. «У гэтым годзе ідзе перавыданне вучэбных дапаможнікаў у адпаведнасці з тэрмінамі іх выкарыстання. Пры падрыхтоўцы падручнікаў да перавыдання ўлічаны вынікі доследнай праверкі і ступень задаволенасці настаўнікаў, навучэнцаў і іх законных прадстаўнікоў якасцю навучальных дапаможнікаў. Праца над якасцю падручнікаў не спыняецца, яна будзе працягвацца і далей у межах падрыхтоўкі іх да перавыдання», – заключыла кіраўнік.

У дапамогу настаўнікам Міністэрства адукацыі распрацавала традыцыйныя інструктыўна-метадычныя лісты, у якіх дадзены рэкамендацыі па арганізацыі адукацыйнага працэсу з улікам асаблівасцяў 2022/23 навучальнага года. Гэтыя лісты па ўсіх прадметах размешчаны на партале адукацыйнага ведамства ў раздзеле «Упраўленне агульнай сярэдняй адукацыі. 2022/23 навучальны год».

БЕЛТА