Перспектывы развіцця «Белшыны» і ход уборачнай: прэм’ер-міністр з рабочай паездкай наведаў Магілёўскую вобласць

Учора прэм’ер-міністр Раман Галоўчанка з рабочай паездкай наведаў Магілёўскую вобласць. У прыватнасці, кіраўнік Урада азнаёміўся з вытворчасцю буйнагабарытных шын на прадпрыемстве «Белшына». Нагадаем, тут рэалізуюцца інвестыцыйныя праекты па стварэнні вытворчасцей суцэльнаметалакордных шын дыяметрам да 63 цаляў і шын дыяметрам 25–29 цаляў.

Перспектыўныя інвестыцыі

Першы праект дазволіць пашырыць асартымент і павялічыць аб’ёмы вытворчасці шын радыяльнай канструкцыі для самазвалаў БелАЗ і замежнай кар’ернай тэхнікі. Ён рэалізуецца ў дзве чаргі. Ужо ўстаноўлена вулканізацыйнае, падрыхтоўча-нарыхтоўчае абсталяванне для забеспячэння патрэб усяго завода і зборачнае абсталяванне для вытворчасці звышбуйнагабарытных шын радыяльнай канструкцыі з пасадкавымі дыяметрамі 57 і 63 цалі. У межах другой чаргі праекта прадугледжваецца набыццё новага зборачнага абсталявання для выпуску шын радыяльнай канструкцыі з пасадачным дыяметрам 49 і 51 цаля плоскім спосабам зборкі. Другую чаргу праекта плануецца рэалізаваць у 2023–2029 гадах, расказаў генеральны дырэктар «Белшыны» Андрэй Бунакоў:

– Асноўная задача – павысіць эфектыўнасць і аддачу ад гэтых праектаў. У першую чаргу гаворка ідзе аб загрузцы абсталявання, якое было ўведзена, і пошуку рынкаў збыту. Сёння ў нас ёсць заказы на другое паўгоддзе. Вядома, трэба папрацаваць над якасцю. Але галоўнае, што зараз закладваецца падмурак далейшай перспектыўнай дзейнасці нашага прадпрыемства. Распрацавана стратэгія развіцця, у тым ліку і экспартная. Мы ведаем, на якіх рынках нас чакаюць. Ёсць заказы. Куды рухацца, мы разумеем, таму, упэўнены, усе будзе добра.

Як чакаецца, пры рэалізацыі гэтых інвестпраектаў сукупны эфект у 2021–2026 гадах дасць магчымасць атрымаць прырост выручкі на паўтара мільярда рублёў. Адзначым, што больш за 90 працэнтаў выпускаемай прадукцыі ідзе на экспарт. Стаўка – на высокамаржынальныя продажы сельскагаспадарчых шын, шын для спецтэхнікі і грузавых аўтамабіляў. За апошні год прадпрыемству ўдалося істотна знізіць складскія запасы і палепшыць паказчыкі тэхналагічных выдаткаў на вытворчасць адной тоны прадукцыі. За студзень-чэрвень 2021-га «Белшына» выпусціла шын на суму 359,5 мільёна рублёў. Экспарт гатовай прадукцыі за шэсць месяцаў склаў 91,7 мільёна долараў. Выручка ад рэалізацыі прадукцыі дасягнула 404,6 мільёна рублёў. Дэталёва перспектывы развіцця прадпрыемства абмеркавалі падчас нарады з удзелам прэм’ер-міністра. Раман Галоўчанка паведаміў журналістам, што стратэгія развіцця «Белшыны» адобрана:

– Рашэнне аб тым, што трэба прадумаць стратэгію развіцця прадпрыемства, мы прынялі яшчэ ў кастрычніку мінулага года. Праведзена вялікая праца. Мы нанялі адну з найбуйнейшых сусветных кансалтынгавых кампаній. Увесь гэты час з камандай прадпрыемства распрацоўвалі стратэгію. Па-іншаму выйсці з няпростага фінансавага становішча, у якое трапіла «Белшына» ў сілу шэрагу прычын, было немагчыма. Мы не проста спадзяёмся на знешнюю экспертызу, а глыбока прапусцілі яе праз рэаліі прадпрыемства, і сёння яна была адобрана.

Па словах Рамана Галоўчанкі, гэта той шлях, які дазволіць планава будаваць далейшую працу на пяцігадовым гарызонце праз рэалізацыю шэрагу кіраўніцкіх рашэнняў на прадпрыемстве, якія будуць пранізваць усю сферу – ад планавання вытворчасці да маркетынгу і збыту:

– Гэта дазволіць знізіць пазыковую нагрузку прадпрыемства і выйсці на максімальную вытворчую магутнасць пасля рэалізаваных інвестпраектаў.

Гаворачы аб далейшай дзяржпадтрымцы «Белшыны», кіраўнік Урада заявіў, што яна будзе зніжацца:

– Гэта экстраны інструмент, які дзяржава будзе ўжываць не як сістэмную меру, а як дапамогу для тых, хто трапіў у цяжкую сітуацыю ў сувязі са зменамі на рынку. Датычна «Белшыны» гаворкі аб новай дзяржпадтрымцы ў выглядзе фінансавых уліванняў не ідзе.

Пры гэтым Раман Галоўчанка адзначыў, што для рэалізацыі стратэгіі развіцця прадпрыемства Урад разгледзіць магчымасць частковай рэструктурызацыі запазычанасці і прымянення льготных умоў для яе пагашэння.

Будзем з хлебам

Падчас рабочай паездкі ў Магілёўскую вобласць Раман Галоўчанка таксама азнаёміўся з ходам уборачнай кампаніі. Кіраўнік Урада наведаў поле прадпрыемства «Вязавіца-Агра» ў Асіповіцкім раёне. Як далажыў старшыня Магілёўскага абласнога выканаўчага камітэта Леанід Заяц, уборка ідзе актыўна:

– Мы перасягнулі экватар. Намалацілі каля 504 тысяч тон. Ураджайнасць складае 30,6 цэнтнера з гектара. Упэўнены, што сёлета мільён тон намалоцім.

Леанід Заяц паведаміў, што ў дадзены момант ідзе перакідка камбайнаў з гаспадарак, якія завяршаюць уборку, у адсталыя:

– Так зладжана працуем па ўсёй вобласці. Да 15 жніўня плануем завяршыць намалот збожжавых і зернебабовых. Зараз ідзе актыўная падрыхтоўка плошчаў пад пасеў азімага рапсу, працягваецца нарыхтоўка кармоў. Аграрыі настроены на вынік, нягледзячы на надвор’е і экстрэмальныя ўмовы.

ВЫСТУПЛЕННЕ ПРЭМ’ЕР-МІНІСТРА

Прэм’ер-міністр пракаментаваў зацверджаную прэзідэнтам Праграму сацыяльна-эканамічнага развіцця на 2021–2025 гады. Па словах Рамана Галоўчанкі, дасягнуць паказчыкаў цяперашняй пяцігодкі можна толькі за кошт максімальнай загрузкі магутнасцей і збыту. Нагадаем, праграмай па выніках пяці гадоў прадугледжаны рост ВУП у 1,2 разы, зарплаты – у 1,5‑2 разы.

– Такія тэмпы могуць быць дасягнутыя за кошт максімальнай загрузкі магутнасцей і збыту. Цяпер многія сектары эканомікі развіваюцца дастаткова дынамічна за кошт росту ўнутранага попыту. Там рост вытворчасці даходзіць да трэці ўзроўню мінулага года. Але гэта кан’юнктурныя фактары. Магчыма, сітуацыя зменіцца. Што тычыцца рэальнага сектара эканомікі, то цяпер галоўнае – дамагчыся аддачы ад інвестпраектаў, рэалізаваных у мінулай пяцігодцы. Гэта пяцігодка павінна стаць інвестыцыйнай. Мы працягнем укладваць кропкава ў тыя аб’екты, якія маюць патрэбу ў мадэрнізацыі, і будзем дамагацца аддачы ад бізнес-планаў, рэалізаваных у мінулай пяцігодцы.

СБ