Працаўладкаванне, няякасны капрамонт, падтапленні: Анатоль Ісачанка правёў прыём грамадзян у Клімавічах

Працаўладкаванне, няякасны капрамонт і падтапленні ўвайшлі ў лік пытанняў, якія паступілі на асабісты прыём грамадзян старшыні Магілёўскага аблвыканкама Анатолю Ісачанку ў Клімавічах.

Са сваімі праблемамі да губернатара прыйшлі сем заяўнікаў з Клімавіч, а таксама Клімавіцкага і Мсціслаўскага раёнаў. Адзін з тых, хто звярнуўся па стане здароўя, мае права на лёгкую працу, аднак ад прапанаваных вакансій адмовіўся. Разам з тым у арганізацыі, дзе ён хацеў бы працаваць, вакантных месцаў пакуль няма.

На прыём таксама прыйшоў жыхар Мсціслаўскага раёна. Мужчына трымае асабістую падсобную гаспадарку, дзе вырошчвае свіней і птушку. Ён прасіў садзейнічання ў выдзяленні яму месца для забою жывёлы, бо вазіць жывёл у Магілёў ці Горкі далёка. Губернатар даў даручэнне прапрацаваць пытанне.

Праблема жыхара Клімавіч, з якой ён звярнуўся на прыём, рэгулярна ўзнікае ў разводдзе: грунтавыя воды падтапляюць яго домаўладанне. У мінулым годзе вада чатыры разы захадзіла ў дом. Ён неаднаразова звяртаўся ў розныя інстанцыі, але так і не атрымаў належнага выніку. Заяўнік хоча дабіцца выканання работ па павелічэнні водапрапускной здольнасці размешчанай побач ракі Лабжанка. У райвыканкаме расказалі, што канкрэтныя крокі для паляпшэння прапускной здольнасці ракі робяцца. Аднак неабходны фінансы на расчыстку рэчышча і будаўніцтва дамбы. Анатоль Ісачанка даручыў дэталёва прапрацаваць пытанне і знайсці спосабы вырашэння.

Адразу некалькі жыхароў прыйшлі па пытанні няякаснага капрамонту дома. Жанчыны адзначаюць, што са сваёй праблемай жывуць ужо шэсць гадоў - з моманту, як жыллё прынята ў эксплуатацыю пасля праведзеных работ.

«Усе бачаць, у якім стане знаходзіцца наш дом, маўклівы агляд - і ніякай рэакцыі, - наракаюць заяўніцы. - Капрамонт праходзіў замест заяўленых двух цэлых восем месяцаў, прычым жыхары нават не адсяляліся. У выніку мы атрымалі холад - у кватэрах гуляе вецер, дах і фасад у расколінах, а таксама іншыя праблемы».

Старшыня Магілёўскага аблвыканкама даручыў падняць праектна-каштарысную дакументацыю і разабрацца, ці разыходзіцца яна з выкананымі работамі. Таксама ён падкрэсліў, што неабходна ўхіліць усе памылкі будаўнікоў, у тым ліку заладзіць швы і пафарбаваць фасад.

Яшчэ адна жыхарка Клімавічаў паскардзілася на пастаянны перанос тэрмінаў капітальнага рамонту двухпавярховага дома 1963 пабудовы на 16 кватэр. «Капрамонт адкладаўся і пераносіцца - з 2024 года ўжо на 2025-ы, - кажа жанчына. - Калектыўная заява жыхароў дома знаходзіцца ў выканкаме, да яе прыкладзены фатаграфіі. Цяпер у кватэрах утварыўся грыбок, пайшла цвіль і волкасць. Цагліны з вуліцы - з вялікімі шчылінамі».

Анатоль Ісачанка падкрэсліў, што калі людзям паабяцалі, то неабходна рабіць, няма іншай альтэрнатывы. Ён распарадзіўся паставіць дом у план на капітальны рамонт і пачаць рабіць праектна-каштарысную дакументацыю. У гэтым ці наступным годзе пачаць працы - вось даручэнне губернатара.

БЕЛТА