Прадпрымальнікі Клічава бяруць ініцыятыву ў свае рукі

Першы салон прыгажосці ў Клічаве – важны інвестпраект для раённага цэнтра. Сёння суб’екты прадпрымальніцтва ў Клічаўскім раёне – а іх больш за тры сотні – забяспечваюць без малога чвэрць паступленняў у мясцовы бюджэт.

Гэта прыклад сямейнага бізнесу, а таксама новыя працоўныя месцы, жаночая занятасць і плацяжы ў бюджэт. Крысціна Гілецкая – бухгалтар, яе муж Сяргей – будаўнік. Яны – мясцовыя жыхары, шматдзетныя бацькі. А цяпер у іх ёсць яшчэ адно дзецішча – сямейная справа. Прычым іх прыватны бізнес – гэта частка развіцця сферы паслуг Клічава і раёна.

Ала Кушнер, як і яе новыя калегі, прыйшла ў салон па інтэрнэт-аб’яве і лічыць, што ёй пашанцавала. Сама дзяўчына, дарэчы, з вядомай шматдзетнай сям’і Кундзікавых. А знайсці працу ў раёне па спецыяльнасці, з добрым заробкам і ў камфортным месцы – вельмі няпроста.

Важна, што ў салоне адкрыліся новыя працоўныя месцы менавіта для жанчын. Некаторым з работнікаў прыйшлося навучыцца новай прафесіі. Упершыню тут з’явіўся свой касметолаг.

Мясцовая ўлада інвестпраект падтрымала: аддала за сімвалічную суму вольны будынак у райцэнтры.

Сёння ў Клічаўскім раёне дзве з паловай сотні прадпрымальнікаў і яшчэ амаль 80 камерцыйных арганізацый. За мінулы год іх стала больш. Прыватнікі заплацілі больш за 3 мільёны рублёў падаткаў у мясцовы бюджэт.

ТРК «Магілёў»