Праслухоўванні ўдзельнікаў, пленэр і кірмаш: першы конкурсны дзень фестывалю «Залатая пчолка» ў Клімавічах

Юбілейны, ХХ Міжнародны фестываль дзіцячай творчасці «Залатая пчолка» сабраў у Клімавічах дзяцей з розных куткоў Беларусі, Расіі, Арменіі, Казахстана, Кыргызстана, Узбекістана – усяго каля 500 удзельнікаў! Сёння іх першы конкурсны дзень: праслухоўванне і прагляд у вакале, харэаграфіі, выяўленчым мастацтве. Для гараджан і гасцей – шмат цікавых лакацый і тэматычных зон.

Першы дзень «Залатой пчолкі» для канкурсантаў адказны. Зараз у Клімавіцкім раённым цэнтры культуры, да прыкладу, праходзіць праслухоўванне ўдзельнікаў у катэгорыі «Вакальнае мастацтва». Ціманаўскі сельскі Дом культуры стаў пляцоўкай, дзе дзеці паказвалі свае таленты ў мастацтве харэаграфічным. Жанравае напаўненне разнастайнае: народны і эстрадны вакал, народна-сцэнічны, эстрадны і сучасны танцы. У гарадскім парку юныя мастакі ўдзельнічаюць у пленэры-конкурсе «Які цудоўны гэты свет».

Для гасцей фестывалю арганізавана інтэрактыўная пляцоўка «У свеце гульні і цацкі», на якой сваю творчасць пакажуць установы культуры Магілёўскай вобласці. Выставы-продажы майстроў, майстар-класы, творчыя інтэрактыўныя праграмы прадставяць Бабруйскі, Быхаўскі, Горацкі, Дрыбінскі, Касцюковіцкі, Краснапольскі, Мсціслаўскі і Хоцімскі раёны.

Цікавую лакацыю падрыхтавалі для гасцей з дзецьмі РАНС і Магілёўаблгаз. На вуліцы Савецкай і ў гарадскім парку на тэматычнай пляцоўцы «Бяспечнае дзяцінства» можна будзе ўбачыць аварыйна-выратавальную тэхніку, а яшчэ прымерыць на сабе ролю выратавальніка і апрануцца ў баявую вопратку і рыштунак.

Само святочнае адкрыццё ХХ Міжнароднага фестывалю дзіцячай творчасці «Залатая пчолка» адбудзецца на плошчы 50 гадоў Вялікага Кастрычніка а 20.30. Пасля – усімі чаканае лазернае шоу і святочны феерверк. Ужо заўтра пройдзе цырымонія ўзнагароджання лаўрэатаў XX Міжнароднага фестывалю дзіцячай творчасці «Залатая пчолка», а таксама заключны гала-канцэрт «Залатое сузор’е талентаў».

 СБ, «Родная нiва»