«Прэзентуем Магілёўскую вобласць і Беларусь». Два буйныя эканамічныя форумы адкрыліся ў Магілёве

XV Міжнародны эканамічны форум «Млын поспеху» і другі кааперацыйны форум па імпартазамяшчэнні дзяржаў - членаў ШАС адкрыліся ў Магілёве.

«Да нас прыязджаюць, знаёмяцца з нашымі навінкамі, прэзентуюць сваю прадукцыю, праводзяць B2B перамовы сам-насам, і гэта дае пэўны эфект, - падкрэсліў старшыня Магілёўскага аблвыканкама Анатоль Ісачанка. - Мы гатовы прымаць бізнес, і прэзентуем не толькі Магілёўскую вобласць, але і ўсю Беларусь. Мы сёння падпісалі шэраг пагадненняў аб супрацоўніцтве з Калінінградскай вобласцю, будаўніцтве новага прадпрыемства ў Клімавіцкім раёне ў рамках развіцця паўднёвага ўсходу, пашыраем свабодную эканамічную зону «Магілёў». Будуць заключаныя дамовы паміж канкрэтнымі прадпрыемствамі і кантракты аб пастаўцы абсталявання, закупцы неабходных дэталяў і элементаў».

У форумах бяруць удзел прадстаўнікі органаў улады, дыпламаты і бізнесмены з 16 рэгіёнаў Расіі, а таксама Кітая, Таджыкістана, Індыі, Ірана і Пакістана. Прыцягненне такой аўтарытэтнай аўдыторыі сведчыць аб цікавасці штогод да эканомікі Магілёўскай вобласці, якая здолела перабудаваць сваю работу ў новых умовах і выйшла на траекторыю ўстойлівага росту. Так, 2023 год рэгіён завяршыў з тэмпам росту валавога рэгіянальнага прадукту 101,6 працэнта, а ў бягучым годзе да гэтай базы ён расце з тэмпам 105,8 працэнта.

Сёння вобласць на пляцоўках форуму прэзентуе новыя інвестыцыйныя ідэі, і гатова ў поўнай меры аказаць садзейнічанне тым, хто будзе іх увасабляць. Сярод перспектыўных напрамкаў: распрацоўка прыродных рэсурсаў і карысных выкапняў (фасфарыты, торф, сапрапель, трэпел), дрэваапрацоўка, АПК, прамысловасць і турызм.

Для адкрытага дыялогу ў рэгіёне ёсць усе неабходныя інструменты падтрымкі бізнесу, такія як свабодная эканамічная зона «Магілёў», Магілёўскае агенцтва рэгіянальнага развіцця, Магілёўскае аддзяленне Беларускай гандлёвай прамысловай палаты, якія ствараюць спрыяльныя ўмовы і садзейнічаюць развіццю сувязей дзелавых колаў з замежнымі партнёрамі і інвестарамі. Яшчэ адной унікальнай перавагай вобласці стаў паўднёва-ўсходні рэгіён, які ўключае ў сябе сем раёнаў. Дзякуючы ўказу Прэзідэнта тут створаны выключныя льготныя ўмовы.

Праграма міжнароднага эканамічнага і кааперацыйнага форумаў разлічана на два дні - 17 і 18 кастрычніка. У яе ўвайшлі пленарнае паседжанне, тэматычныя дыскусіі, секцыі, прэзентацыя тавараў экспартна арыентаваных прадпрыемстваў, В2В-перамовы. На секцыях будуць абмяркоўвацца пытанні галіновых праблематык, імпартазамяшчэння, падтрымкі экспарцёраў, новых лагістычных шляхоў і транспартных калідораў, інструменты фінансавага рынку, актуальныя задачы працэсу інтэграцыі рэгіянальнага бізнесу ў сусветную эканамічную прастору. Таксама адбудзецца ўрачыстая цырымонія падпісання пагадненняў і дагавораў.

Часткай праграмы стала выстава экспартна арыентаваных прадпрыемстваў з дзяржаў - чальцоў ШАС, якая сабрала 1,5 тыс. удзельнікаў, у тым ліку прадстаўнікоў буйных кампаній, малога і сярэдняга бізнэсу, выканаўчай улады.

БЕЛТА