Прыбраць цукровыя буракі на палях гаспадаркі «Магілёўскі лянок» спяшаюцца да першых замаразкаў

Інфармацыя пра насенне цукровых буракоў, а потым і пра цукар у 2022 годзе трапілі ў топ фейкавых навін. Загалоўкі пра недахоп салодкага прадукту палохалі і прымусілі некаторых беларусаў рабіць вялікія запасы. Улетку ажыятаж вакол цукру дасягнуў свайго піку, але на справе аказалася, што такі попыт звязаны з вітаміннымі нарыхтоўкамі на зіму, а дэфіцыту ў краіне няма і не будзе. Больш за тое, на салодкіх крышталях Беларусь плануе яшчэ і зарабіць. Новы цукровы сезон выйшаў на фінішную прамую: карняплоды цалкам прыбралі ў чатырох рэгіёнах краіны, і на сёння ўраджай склаў больш за 4 мільёны тон.

Гэта дзесьці кілаграмовы карняплод, грам 800. Раўнамерны, без дуплістасці, думаю, нібы ідэал.

Такія вось салодкія горы на палях гаспадаркі «Магілёўскі лянок» растаюць на вачах. Ухадзіцца з уборкай ураджаю тут спяшаюцца да першых замаразкаў. Тэмп работ мог быць і вышэйшым. На мель палявыя караблі садзіць надвор’е. З-за вільготнай глебы гружаная тэхніка часта буксуе. На дапамогу прыходзіць трактар, і не адзін.

Вядома, праца такіх «картэжаў» – гэта дадатковы час і паліва, але лепшага надвор’я можна і не дачакацца. Таму тэхніка ў палях працуе з раніцы і да ночы. Аграрыі часта глядзяць у неба. Дождж, якога так чакалі летам, цяпер можа парушыць усе планы. Каб буракі, абязводжаныя летняй спёкай, паспелі набраць вільгаць і цукар, з уборкай у гаспадарцы не спяшаліся і не пралічыліся. Цукрыстасць – 18%, ураджайнасць таксама дастойная.

Васіль Лістападаў, галоўны аграном сельгаспрадпрыемства «Магілёўскі лянок»:

– Заўсёды хочацца лепш, планавалі 600 цэнтнераў мінімум на год атрымаць, але, на жаль, мабыць, халодная вясна ў пачатку пасеву, была затрымка ў росце і развіцці раслін. Таму 500 цэнтнераў, думаю, атрымаем у канчатковым выніку, што будзе нядрэнна для гэтага года.

На шчасце аграрыяў, прайшлі тыя часы, калі буракі прыбіралі ўручную. Бо раней людзі вырывалі, церабілі, а потым складвалі карняплоды ў такія капцы. Сёння ўсё гэта робіць тэхніка, а гэта машына рыхтуе караняплоды да далёкай дарогі на завод.

Ужо пяць гадоў запар ураджай буракоў з палёў прыбірае Сяргей Круцько. Калі летам у краіне здарыўся цукровы перапалох, мужчына не мог стрымаць усмешку.

Сяргей Круцько, аператар пагрузчыка:

– Народ сам паніку пускае, што цукру не будзе. Цукру – во, грузі буракі, калі ласка, мы без цукру не будзем: калі сеем буракі, значыць, цукар будзе. Таму чаму тут панікаваць дарэмна.

З палёў ураджай адпраўляецца на чыгуначную станцыю, а затым яго вязуць у вагонах на Слуцкі цукрарафінадны камбінат. Сёння буракі цалкам прыбралі ў чатырох абласцях краіны. Менш чым паўпрацэнта пасеваў застаецца ў Магілёўскім і Гродзенскім рэгіёнах. На перапрацоўку ўжо адпраўлена 80% ураджаю. Усе гэтыя лічбы гавораць аб тым, што зімовы сезон у беларусаў будзе салодкім.

СТВ