Размеркаванне скончылася, а праца - не. Калі маладыя спецыялісты вырашаюць застацца

Праз тыдзень маладыя спецыялісты адправяцца на першыя працоўныя месцы, а хлопцы, размеркаванне якіх падышло да канца, атрымаюць права развітацца з наймальнікам. Зрэшты, сярод іх нямала тых, хто падпісаў ужо новы кантракт, каб працаваць далей. Сярод іх - інжынер-тэхнолаг «Бабруйскаграмаша» Мікіта Капорскі. Падчас вучобы ў Беларуска-Расійскім універсітэце ён праходзіў на прадпрыемстве ўсе практыкі і паспеў прыгледзецца.

- Тое, што я ўбачыў, мне спадабалася, таму вырашыў, што хачу размеркавацца сюды. І мне пайшлі насустрач: прадпрыемства таксама зацікаўлена ў людзях, якія не зусім «нулявыя» і разумеюць, як арганізаваны працэс, як і з чым ім давядзецца працаваць.

Адаптацыя ў Мікіты прайшла лёгка:

- Праўда, пачаткоўцам звычайна бывае складана вывучыць размяшчэнне цэхаў. Спачатку блытаўся, потым прывык. Вядома, нюансаў у працы шмат, таму спачатку часта звяртаўся па дапамогу да калег, і яны ніколі не адмаўлялі. Каб маладыя спецыялісты хутчэй уліліся ў працэс, для нас ладзілі навучальныя семінары, напрыклад – па ашчаднай вытворчасці.

Апроч добрага заробку і сацыяльных «плюшак» ёсць яшчэ адзін вялікі плюс – праца пакідае час на «пажыць». Мікіта тры разы на тыдзень ходзіць у спартзалу, шмат чытае і кожны дзень займаецца англійскай. Зрэшты, хутка часу на гэта стане менш:

– Паступіў у магістратуру БНТУ на спецыяльнасць «інжынерны бізнес». На вучобу накіравала прадпрыемства. Будзем лічыць гэта яшчэ адным карпаратыўным бонусам.

Па матэрыялах СБ