Рэгіянальныя адборачныя туры конкурсу «Уладар вёскі» стартуюць у Беларусі 15 мая

Рэгіянальныя адборачныя туры рэспубліканскага конкурсу «Уладар вёскі» стартуюць у Беларусі 15 мая, паведаміла начальнік аддзела па рабоце з працоўнай моладдзю Цэнтральнага камітэта БРСМ Ганна Сапоцкая.

«Раённыя этапы конкурсу сімвалічна стартуюць у міжнародны дзень сям'і - 15 мая. Да 10 чэрвеня яны пройдуць ва ўсіх рэгіёнах. Пераможцы адправяцца ў абласныя туры праекту, якія будуць арганізаваныя да 26 чэрвеня, дзе пазмагаюцца за права на ўдзел у рэспубліканскім фінале. Урачыстае ўзнагароджанне сем'яў-пераможцаў традыцыйна будзе праходзіць у рамках рэспубліканскага свята «Купалле» ў аграгарадку Александрыя Магілёўскай вобласці», - распавяла Ганна Сапоцкая.

Паводле яе слоў, да ўдзелу ў конкурсе запрашаюцца маладыя сем'і з дзецьмі, у якіх хоць бы адзін з мужа і жонкі знаходзіцца ва ўзросце да 31 года, якія пражываюць у сельскай мясцовасці больш за 2 гады, вядуць асабістую падсобную гаспадарку, працуюць у сельскай мясцовасці (у тым ліку ў галінах сацыяльнай сферы, будаўніцтва, сельскай гаспадаркі, прамысловасці, фермерская гаспадарка.

«Праект стартаваў у 2007 годзе ў Глыбоцкім раёне, у 2008 годзе быў падтрыманы ўсімі рэгіёнамі краіны, а ў 2009 годзе змяніў статус на рэспубліканскі. З гэтага моманту ён праводзіцца штогод. Каб атрымаць ганаровае званне «Уладар вёскі», удзельнікам трэба будзе пазмагацца ў сельскагаспадарчых спаборніцтвах і творчых конкурсах», - адзначыла Ганна Сапоцкая.

Конкурс праводзіцца БРСМ, Міністэрствам адукацыі, Міністэрствам сельскай гаспадаркі і харчавання, Магілёўскім абласным выканаўчым камітэтам з мэтай папулярызацыі сельскагаспадарчай працы і побыту, а таксама павышэння ролі і значэння сям'і як важнейшага сацыяльнага інстытута грамадства, фарміравання ў моладзі пазітыўнага стаўлення да традыцыйных сямейных каштоўнасцей.

БЕЛТА