Рэспубліканская дабрачынная акцыя «Нашы дзеці» стартуе ў Магілёўскай вобласці 10 снежня

Рэспубліканская дабрачынная акцыя «Нашы дзеці» стартуе ў Магілёўскай вобласці 10 снежня. Пра гэта карэспандэнту сайта паведамілі ў галоўным упраўленні па адукацыі аблвыканкама.

Да 10 студзеня 2021 года ва ўсіх рэгіёнах Магілёўшчыны будуць арганізаваны дзіцячыя навагоднія святы з удзелам старшыні аблвыканкама, яго намеснікаў, кіраўнікоў гарадскіх і раённых выканаўчых камітэтаў, мясцовых адміністрацый раёнаў гарадоў Бабруйска і Магілёва, структурных падраздзяленняў аблвыканкама. Ужо зацверджаны спіс арганізацый, у тым ліку грамадскіх, і прадпрыемстваў Прыдняпроўскага краю, якія ў калядныя і навагоднія святы наведаюць 52 дзіцячыя дамы сямейнага тыпу, 23 цэнтры карэкцыйна-развіваючага навучання і рэабілітацыі, 6 дзіцячых сацыяльных прытулкаў, 10 інтэрнатных устаноў абласнога падпарадкавання, Вясноўскі дом-інтэрнат для дзяцей і інвалідаў з асаблівасцямі псіхафізічнага развіцця, Магілёўскі спецыялізаваны дом дзіцяці.

Традыцыйна напярэдадні Новага года пройдзе Калядны кадэцкі баль. Сёлета ён адбудзецца 21 снежня. А 23 снежня Палац культуры вобласці прыме абласны навагодні баль для навучэнскай і студэнцкай моладзі.   

Галоўная рэгіянальная навагодняя ўрачыстасць папярэдне запланавана на 29 снежня. У Палац культуры вобласці запросяць дзяцей з усіх рэгіёнаў: выдатнікаў вучобы, пераможцаў раённых і абласных алімпіяд, конкурсаў і спаборніцтваў, лідараў і актывістаў дзіцячых грамадскіх арганізацый, дзяцей-сірот і дзяцей, якія засталіся без апекі бацькоў, навучэнцаў Магілёўскага абласнога кадэцкага вучылішча, выхаванцаў інтэрнатных устаноў адукацыі і прыватнай сацыяльна-педагагічнай установы адукацыі «SOS-Дзіцячая вёска Магілёў». Хлопцы і дзяўчаты прымуць удзел у прадстаўленні каля ёлкі, атрымаюць салодкія падарункі і ўбачаць яркае шоу-мюзікл «Навагодні батл» па матывах «Папялушкі». На сцэне збяруцца героі самых розных казак, займальных гісторый і нават эпох.

23–24 снежня 100 дзяцей з Магілёўскай вобласці стане гасцямі дабрачыннага свята з удзелам кіраўніка дзяржавы Аляксандра Лукашэнкі ў Палацы Рэспублікі горада Мінска. Таксама ў навагодніх мерапрыемствах у сталічным Палацы Незалежнасці 27–29 снежня прыме ўдзел дэлегацыя навучэнцаў і студэнтаў рэгіёна, а 29 снежня – дзеці сацыяльна ўразлівых катэгорый.

Часткай акцыі «Нашы дзеці» ў рэгіёне з’яўляецца марафон «Сагрэем дзіцячыя сэрцы», закліканы спрыяць аказанню матэрыяльнай дапамогі дзецям з малазабяспечаных і шматдзетных сем’яў, дзецям-сіротам, дзецям-інвалідам і дзецям, якія апынуліся ў цяжкай жыццёвай сітуацыі. Яго арганізуе Магілёўскае абласное аддзяленне РГА «Беларускі дзіцячы фонд» пры падтрымцы Магілёўскага аблвыканкама. У межах акцыі традыцыйна на канале «Беларусь 4. Магілёў» у прамым эфіры праводзіцца аднайменны тэлемарафон. Сёлета ён адбудзецца 18 снежня з 14.00 да 20.30.

Суразмоўцы запэўнілі: нягледзячы на сітуацыю з распаўсюджваннем каранавіруснай інфекцыі, без увагі і падарунка не застанецца ні адно дзіця. Усе намаганні будуць накіраваны на тое, каб святы адбыліся. Навагоднія паказы пройдуць у традыцыйным фармаце, але абавязкова з захаваннем санітарна-эпідэміялагічных мер і сацыяльнага дыстанцыявання: на кожным з іх будзе абмежавана колькасць удзельнікаў. Бо здароўе дзяцей – гэта галоўнае.

«Акцыя «Нашы дзеці» – гэта выдатная магчымасць падзяліцца часцінкай свайго душэўнага цяпла, пераўвасобіцца ў казачных чараўнікоў, што выконваюць запаветныя жаданні дзетак, для якіх адчуваць увагу і клопат дарослых вельмі важна», – падкрэслілі ў галоўным упраўленні па адукацыі аблвыканкама.