Рыцары ў зіхоткіх даспехах і дамы ў выдатных сукенках. У Мсціславе прайшоў фестываль сярэднявечча

Горад Мсціслаў у Магілёўскай вобласці 3 жніўня стаў галоўнай святочнай кропкай на карце рэгіёна. Тэматычная музыка, людзі ў сярэднявечных уборах, дамы ў багатых убраннях і рыцары ў зіхатлівых даспехах перанеслі гасцей «Рыцарскага фэсту» ў мінулае. Асаблівае гучанне надае фестывалю месца правядзення - Замкавая гара. Відовішчныя бугурты, конна-трукавае шоу, турнір лучнікаў, разнастайныя лакацыі і майстар-класы, а ноччу фаер-шоу і канцэрты - усім гэтым напоўнены фестывальны дзень у Мсціславе. Карэспандэнты БЕЛТА адправіліся на незвычайны фестываль, каб таксама прасякнуць яго атмасферай.

Як распавёў старшыня Мсціслаўскага райвыканкама Дзмітрый Пімашэнка, «Рыцарскі фэст» з году ў год прырастае гасцямі, новымі лакацыямі і рашэннямі.

«Фестываль ужо даўно ступіў далёка за межы не толькі нашага раёна, але і Магілёўскай вобласці. Яго ведаюць і ў нашай краіне, і па-за межамі. Яго любяць і чакаюць. Вельмі шмат гасцей, якія традыцыйна прыязджаюць на наша свята. Сёлета фестываль праходзіць 16-ы раз, а гэта ўжо пэўны этап сталення, паўналецця, - расказаў ён. – «Рыцарскі фэст» прыжыўся ў культурным календары падзей нашай краіны».

Дзмітрый Пімашэнка падзяліўся і сваімі чаканнямі ад свята: «Мы чакаем ад гэтага фестывалю яркіх эмоцый, новых уражанняў. Тут сабралася вялікая колькасць рыцарскіх клубаў, майстроў. Кожны з наведвальнікаў фестывалю знойдзе сабе занятак па інтарэсах. А яшчэ яны змогуць убачыць, як жылі людзі ў тым гістарычным этапе. Таксама мы раскажам, чым жыве мсціслаўская зямля зараз».

Па традыцыі цэнтральная частка горада стала вялікім сярэднявечным кірмашом. Разнастайныя вырабы ручной працы са скуры, металу і дрэва - майстры гатовы выканаць любы капрыз практычна на месцы. Майстар-класы па разьбе па дрэве для дарослых, незвычайныя забавы для дзяцей - нават дарослыя былі не супраць выпрабаваць свае сілы ў баях на падушках на бервяне. Смачныя пачастункі, якіх сапраўды хопіць на ўсіх, здзіўляюць разнастайнасцю.

Сярод майстроў - Вераніка Сямёнава. Яна разам з мужам прыехала з Гродна. «Мы прыехалі першы раз. Але заўсёды вельмі хацелі патрапіць сюды. Проста так складалася, што «Рыцарскі фэст» супадаў з іншымі святамі. Але сёлета ўсё атрымалася, і мы нарэшце тут», - падзялілася яна.

Муж і жонка Сямёнавы падрыхтаваліся грунтоўна - не толькі разнастайны тавар ручной працы прадставілі, але і ўборы, упрыгожванні падабралі ў стылістыцы фестывалю. «Мы прывезлі драўляны посуд, заколкі для валасоў. Прама тут мой муж будзе паказваць майстар-клас па разьбярстве па дрэве. Мы прывезлі розныя вязаныя вырабы: шапкі, цацкі, дываны. Я стараюся адраджаць беларускае вязанне як рамяство. Мы ездзім па вёсках, вывучаем прадметы адзення і ўжытку, якія дасталіся людзям ад продкаў. Вельмі хочацца ўсё гэта захаваць для наступных пакаленняў», - распавяла яна.

Адной з удзельніц шэсця была жыхарка Мсціслаўля Вольга Маёрава. Яе сукенка аздоблена мехам, прыгожымі карункамі і граючымі на сонца камянямі. «Я яшчэ ніколі не прымярала такога вобраза. У гэтым гарнітуры я пачуваюся сапраўднай каралевай», - падзялілася яна.

Прымалі ў шэсці ўдзел і дзеці. Так, сямігадовая Анастасія Томашава выконвала ролю дачкі князя. Маленькая дзяўчынка займаецца ў мясцовай школе мастацтваў - спазнае акцёрскае майстэрства. «Мне вельмі падабаецца мая сукенка, я сябе ў ёй адчуваю прынцэсай, - сказала дзяўчынка. - Я крыху хвалявалася, пакуль ішла ў шэсці, бо на нас глядзела шмат людзей. Але ўсё атрымалася. А зараз мы з бацькамі будзем гуляць на свяце».

Сэрца фестывалю - Замкавая гара. Тут гледачам паказалі сярэднявечную казку пад назвай «Легенда аб Мсціславе» ў выкананні конна-гістарычнага клуба «Залатая шпора». Майстэрства наезнікаў, прыгажосць іх скакуноў і захапляльны сюжэт гісторыі да самага канца трымалі ўвагу гледачоў.

Упершыню ўбачыць ажывелую гісторыю ў Мсціслаў прыехала магіляўчанка Марына Варанцова з сям'ёй. «У Мсціслаўлі мы ўжо былі, а вось на фестываль прыехалі ўпершыню. Нешта падобнае мы бачылі ў Піцеры некалькі гадоў таму, але тут маштаб уразіў. Дзіўная метамарфоза адбылася з горадам: мы бачылі яго мінулай восенню ціхім і спакойным, а ўлетку сёлета ён паўстаў перад намі зусім іншым», - падзялілася яна.

Разам з мамай на свята прыехала дачка Паліна. Дзяўчынка займаецца конным спортам, таму больш за ўсё ёй спадабалася выступленне з канямі. А вось сыну магіляўчанкі Станіславу вельмі спадабалася ўсё ўяўленне «Легенда пра Мсціслаў», але асабліва яго ўразілі рыцары.

Самай смачнай лакацыяй Замкавай гары стала прэзентацыя і дэгустацыя страў сярэднявечнай кухні. Сярод тых, хто зазываў па смачныя пачастункі, гаспадыня Агата і гаспадар Сцяпан. «Мы прадстаўляем на свяце Краснагорскі і Капачэўскі сельвыканкамы. Мы сумесна рыхтаваліся да гэтага цудоўнага свята - накрылі для дарагіх гасцей багаты стол, - расказала гаспадыня. - Прапануем пачаставацца хатняй каўбасой, кумпякамі, салёным салам, блінамі і рыбай з нашых рэк Віхура і Сож. А каронная страва ў нас называецца «Вока дракона». Гэта хатні хлеб, сала, кроп. Вянчае гэты бутэрброд яечня-глазуння».

Доўгачаканыя бугурты - традыцыйная разыначка фестывалю. Сутычкі былі яркімі і эмацыйнымі. А летняе, хоць і халаднаватае надвор'е, і сонца дабавілі рыцарам выпрабаванняў - даспехі і зброю і без таго цяжкія. Але ніякія нязручнасці не змаглі сапсаваць удзельнікам уражанні ад бітваў. Яны ўвайшлі ў такі азарт, што практычна адразу зламалі рысталішча.

Нягледзячы на гучную музыку і каментары вядучых, гукі ўдараў цяжкай зброі аб браню былі добра чутныя. Здаецца, цягам усіх бугуртаў гледачы пераставалі дыхаць. Але яркая падтрымка публікі дадавала запалу рыцарам.

Сярод іх - Вадзім Кавалёў з Барысава. З мужчынам удалося пагутарыць, калі ён адпачываў пасля цяжкага бою. «Усе супернікі ў нас заўсёды вартыя. Змагаліся на пяску, ён не даваў моцна разагнацца, - дзеліцца ўражаннямі мужчына. - У мінулым годзе я прыехаў сюды ўпершыню. Выдатны фестываль».

Такое незвычайнае хобі ў Вадзіма з'явілася дзякуючы яго калегу. «Я працаваў з чалавекам, які захапляўся рэканструкцыяй. У выніку ён сышоў, а я застаўся, мяне захапіла. Бо тут ёсць крыху рамантыкі, спорту і драйву», - распавёў ён.

Працягваліся выступленні на Замкавай гары паказальным выступленнем і трукавым шоу ад клуба «Шатландская пяхота», гумарыстычным конна-трукавым шоу «Няўдалыя сваты» ад конна-гістарычнага клуба «Залатая шпора». А далей - тактычныя бугурты: захоп сцяга, ахова караля, масавыя бітвы, турнір лучнікаў і тэатралізаваны штурм замка..

Бліжэй да ночы для гасцей фестывалю падрыхтавалі вогненныя выступленні і канцэрты. Да позняй ночы Мсціслаў будзе жыць сваім яркім фестывальным жыццём.

Як адзначыў намеснік старшыні Магілёўскага аблвыканкама Алег Стэльмашок, «Рыцарскі фэст» - гэта сапраўдны брэнд не толькі Мсціслаўскага раёна, але і ўсёй Магілёўскай вобласці. «Ён вядомы далёка за межамі нашага рэгіёна. Сёння тут прысутнічае шмат гасцей з розных рэгіёнаў, блізкіх рэгіёнаў Расіі. Тут збіраюцца сапраўдныя аматары гэтага фестывалю, якія пабываўшы раз, прыязджаюць сюды кожны год. Гэта і ўдзельнікі, і рамеснікі, і гандлёвыя прадпрыемствы, і госці, якія хочуць убачыць розныя лакацыі, звязаныя з нашай старажытнай культурай, якая захоўваецца і прымнажаецца, - адзначыў ён. - Вядома, гэта сямейны адпачынак, для кампаній сяброў. Тут знаходзяцца новыя сябры, узнікаюць новыя інтарэсы. І чалавек любога ўзросту зможа знайсці сабе занятак па душы. Мы падтрымліваем усебакова такія фестывалі. Чакаецца, што сёлета гасцямі «Рыцарскага фэсту» стануць больш за 15 тыс. чалавек. А гэта вельмі сур'ёзная лічба для раённага свята».

БЕЛТА