Сенатар: Аляксандр Лукашэнка ў інтэрв'ю часопісу Time агучыў сваю цвёрдую пазіцыю па ўкраінскім канфлікце - толькі мір

Прэзідэнт Беларусі глыбока занепакоены канфліктам паміж брацкімі народамі і заклікае не проста да перамір'я, а да міру. Такую думку агучыў член Савета Рэспублікі Ігар Сяргееў, каменціруючы інтэрв'ю Аляксандра Лукашэнкі амерыканскаму выданню Time.

Паводле слоў парламентарыя, беларускі лідэр заўсёды выступаў за ўрэгуляванне канфлікту, не раз арганізоўваў пляцоўку перагавораў, каб падпісаць мінскія дамоўленасці, даваў інтэрв'ю і звяртаўся з прапановамі сесці за стол перагавораў.

- Вядома, сувязь будзе страчана паміж брацкімі народамі на пэўны час, - лічыць Ігар Сяргееў. — Аднак чалавечая памяць уладкованая такім чынам, што з часам цішэе боль ад жахаў мінулага, надыходзіць перамір'е паміж варагуючымі дзяржавамі і нават выбудоўваецца супрацоўніцтва на розных узроўнях. Кіраўнік дзяржавы і на гэты раз прапануе на тэрыторыі Беларусі падрыхтаваць сустрэчу лідэраў Амерыкі і Расіі ў імя міру. Гэта перш за ўсё сведчыць аб міратворчых поглядах беларускага лідэра.

Сенатар адзначае, што меркаванне аб зняцці санкцый успрымаецца праз прызму пройдзенага вопыту:

- У Беларусі з Расійскай Федэрацыяй саюзніцкія адносіны ва ўсім: агульная гісторыя, ваенныя, ваенна-тэхнічныя, эканамічныя, палітычныя, культурныя, адукацыйныя, навуковыя. Гэты спіс можна працягваць далей. Калі ж Еўропа не жадае з намі супрацоўнічаць, будзем стукацца туды, дзе адчыняюць дзверы. Калі раней нашу прадукцыю пастаўлялі ў тым ліку і ў Еўропу і ва Украіну, сёння мы экспартуем яе ў Расійскую Федэрацыю і Кітай. Актыўна асвойваюцца новыя рынкі збыту ў Індыю, краіны Афрыкі, Лацінскай Амерыкі і іншыя. Нашыя партнёры надзейныя і маюць патрэбу ў беларускай індустрыі.

Ігар Сяргееў падкрэслівае, што беларускі лідэр мудра і шчыра адказаў на правакацыйныя пытанні.

- Зацікаўленыя бакі павінны ўспрыняць прапанаваную беларускім лідэрам тактыку аб'ектыўна. І ў бліжэйшы час будзем чакаць рэакцыю, - рэзюмаваў ён.

 СБ