Шаснаццаціразовы чэмпіён Паралімпіяд Ігар Бокій пачынае выступленні на Гульнях у Парыжы

У Парыжы стартуе праграма спаборніцтваў XVII летніх Паралімпійскіх гульняў з удзелам беларускіх спартсменаў.

У першы дзень спаборніцтваў у сталіцы Францыі будуць разыграны 22 камплекты ўзнагарод у трох відах спорту - плаванні, тхэквандо і веласпорце на трэку. У басейне Пары-Ла-Дэфанс Арэны выступіць самы тытулаваны беларускі паралімпіец Ігар Бокій, які заяўлены на стаметроўцы батэрфляем у класе S13. Папярэдні заплыў з удзелам нашага спартсмена адбудзецца каля апоўдні па мінскім часе. Усяго ў гэтым відзе праграмы прымуць удзел 14 атлетаў, у вячэрні фінал пройдзе лепшая васьмёрка. Бокій перамагаў на сотні батэрфляем на трох папярэдніх Паралімпіядах, таксама Ігар з'яўляецца сусветным рэкардсменам на гэтай дыстанцыі.

Акрамя Бокія, нашу каманду па плаванні ў Парыжы прадставяць Дзмітрый Салей, Максім Вашкевіч, Ягор Шчалканаў, Настасся Зудзілава і Яўген Кавалёнак. Яшчэ двое нейтральных атлетаў з Беларусі будуць змагацца за медалі ў лёгкай атлетыцы - Лізавета Дабравольская (кіданне кап'я) і Уладзіслаў Грыб (кіданне булавы.)

Летнія Паралімпійскія гульні ў сталіцы Францыі прадоўжацца па 8 верасня.

БЕЛТА