Рус Бел Eng 中文

Шосты том энцыклапедыі «Рэгіёны Беларусі» прысвечаны Магілёўскай вобласці

Шосты том энцыклапедыі, надрукаваны выдавецтвам «Беларуская энцыклапедыя імя Петруся Броўкі», прысвечаны Магілёўскай вобласці. Пра гэта паведамляецца на сайце выдавецтва.

У кнізе ў алфавітным парадку прадстаўлена інфармацыя пра ўсе сферы жыцця рэгіёна: прыроду, гісторыю, эканоміку, культуру і гісторыка-культурную спадчыну, ахову здароўя, адукацыю, сацыяльную сферу, народную творчасць, развіццё спорту і турызму. Тут можна знайсці інфармацыю пра такія значныя для краіны прамысловыя прадпрыемствы, як «Белшына», «Беларускі цэментны завод», «Крычаўцэментнашыфер», «Крычаўскі завод жалезабетонных вырабаў», «Дамачай», «Чырвоны харчавік» і інш.

У энцыклапедыю ўключаны артыкулы пра адміністрацыйна-тэрытарыяльны склад вобласці і яе інфраструктуру, развіццё аўтамабільнага, чыгуначнага і паветранага транспарту, водныя рэсурсы і водны ўнутраны транспарт, жыллёвае будаўніцтва і бытавое абслугоўванне насельніцтва, развіццё аховы здароўя і сістэму бальніц і дыспансераў.

 

Выданне ўключае артыкулы пра галоўныя ўпраўленні і камітэты Магілёўскага аблвыканкама, а таксама пра сродкі масавай інфармацыі, творчыя калектывы, якія маюць званне «заслужаны» і «народны», помнікі гісторыі і культуры, у ліку якіх замкі, цэрквы і храмы, старадаўнія сядзібы. Гісторыка-культурнымі рарытэтамі рэгіёна з’яўляюцца Бабруйская крэпасць, мемарыяльны комплекс «Буйніцкае поле», Крычаўскі курган Славы, Жыліцкі палацава-паркавы ансамбль.

Музейную сетку Магілёўскай вобласці ў гэтым томе прадстаўляюць Бялыніцкі раённы мастацкі музей імя В. К. Бялыніцкага-Бірулі, Бабруйскі, Клічаўскі, Касцюковіцкі краязнаўчыя музеі, Быхаўскі гісторыка-краязнаўчы музей, Клімавіцкі раённы краязнаўчы музей, Краснапольскі раённы гісторыка-этнаграфічны музей, Круглянскі раённы гісторыка-краязнаўчы музей.

Магілёўшчына вядомая далёка за межамі рэгіёна і краіны сваімі міжнароднымі і рэгіянальнымі фестывалямі, сярод якіх міжнародны музычны фестываль «Залаты шлягер», міжнародны пленэр па мастацкай кераміцы «Арт-Жыжаль», міжнародны пленэр па скульптуры з каменю «Каменная казка», міжнародны фестываль «Вянок дружбы», фестывалі народнай творчасці «Вясновыя колеры», «Дрыбінскія таржкі», «З крыніц жыватворных», міжнародны фестываль дзіцячай творчасці «Залатая пчолка» і многія іншыя.

Зацікаўлены чытач знойдзе ў томе інфармацыю пра такія раёны, як Бялыніцкі, Бабруйскі, Быхаўскі, Глускі, Горацкі, Дрыбінскі, Кіраўскі, Клімавіцкі, Клічаўскі, Касцюковіцкі, Краснапольскі, Крычаўскі і Круглянскі, а таксама пра гарады Бялынічы, Бабруйск, Быхаў, Кіраўск, Клімавічы, Клічаў, Касцюковічы, Крычаў і Круглае, гарадскія пасёлкі Глуск, Дрыбін, Краснаполле, а таксама пра шырока вядомую ў Беларусі вёску Александрыя Шклоўскага раёна, знакамітую штогадовым рэспубліканскім святам «Купалле» («Александрыя збірае сяброў»). Прыроднымі аб’ектамі вобласці з’яўляюцца рэкі Бярэзіна, Бесядзь, Вабіч, Віхра, Днепр, Друць, Іпуць і іншыя.

У энцыклапедыі прадстаўлены артыкулы пра баявыя дзеянні на тэрыторыі вобласці ў Вялікую Айчынную вайну, пра партызанскі і падпольны антыфашысцкі рух у гады вайны (артыкулы «Бялыніцкае антыфашысцкае падполле», «Бабруйскае антыфашысцкае падполле», «Клімавіцкае камсамольска-маладзёжнае падполле», «Краснапольскае антыфашысцкае падполле», «Крычаўскае антыфашысцкае падполле», «Круглянскае антыфашысцкае падполле») і іх арганізатараў і кіраўнікоў. У кнізе прадстаўлены матэрыялы пра Герояя Савецкага Саюза і поўных кавалераў ордэна Славы, якія нарадзіліся на магілёўскай зямлі або атрымалі гэта высокае званне за подзвігі, здзейсненыя пры вызваленні вобласці ад нямецка-фашысцкіх захопнікаў.

 

Важная частка выдання – найлепшыя людзі рэгіёна, якія сваёй працай, творчасцю, навуковай дзейнасцю, спартыўнымі дасягненнямі ўнеслі важкі ўклад у яго развіццё і вельмі важныя для Рэспублікі Беларусь у цэлым.

Падрыхтоўка важнага для рэгіёна і краіны ў цэлым выдавецкага праекта на ўсіх этапах вялася ў цесным плённым супрацоўніцтве з адпаведнымі структурамі абласнога і раённых выканаўчых камітэтаў, а кіраўніцтва вобласці ўваходзіць у рэдакцыйную калегію выдання.

Энцыклапедыя «Рэгіёны Беларусі» – універсальнае шматтомнае выданне, кожны том якога прысвечаны асобнай вобласці Рэспублікі Беларусь, 7-ы том – сталіцы дзяржавы – гораду Мінску. На 2020 год у выдавецтве «Беларуская энцыклапедыя імя Петруся Броўкі» пабачылі свет тамы энцыклапедыі, прысвечаныя Брэсцкай, Віцебскай, Гомельскай, Гродзенскай, Мінскай і Магілёўскай абласцям. Пра важнасць гэтага выдавецкага праекта для рэгіёна і ўсёй краіны ў цэлым гаворыць той факт, што энцыклапедыя ўключана ў пералік найважнейшых сацыяльна значных выданняў і рыхтуецца пры фінансавай падтрымцы Міністэрства інфармацыі Рэспублікі Беларусь.

Рэд.,фота - bel-en.by, відэа ТРК «Магілёў»

 

Пры выкарыстанні матэрыялаў актыўная гіперспасылка на mogilev-region.gov.by абавязковая