Што змянілася ў абноўленым Законе «Аб ахове здароўя»

Нацыянальная акрэдытацыя, закупка лекаў па-за фармулярам - што змянілася ў абноўленым Законе «Аб ахове здароўя»

2 лютага ўступіў у сілу Закон «Аб змене законаў па пытаннях аховы здароўя». Навацыі абумоўлены развіццём сусветнай і айчыннай практыкі па паляпшэнні арганізацыі меддапамогі.

- Прэзідэнт паставіў перад галіной некалькі задач, - падкрэсліў міністр аховы здароўя Аляксандр Хаджаеў. - Забяспечыць якасць і даступнасць меддапамогі, развіваць дыспансерызацыю для выяўлення захворванняў на ранніх стадыях, павысіць значнасць акрэдытацыі арганізацый і вырашыць пытанне з падрыхтоўкай і замацаваннем медкадраў на месцах.

Каб дасягнуць высокіх паказчыкаў, патрэбны змены. Адно са значных - увядзенне нацыянальнай акрэдытацыі арганізацый аховы здароўя. Міністр удакладніў: калі абавязковая базавая акрэдытацыя адказвае за бяспеку паслуг, то нацыянальная - за іх якасць. Разам з сертыфікатам клініка атрымлівае і бонусы: напрыклад, фінансаванне абсталявання больш высокага ўзроўню, павелічэнне стажыровак.

Яшчэ адна навэла - заканадаўча дазволена за кошт рэспубліканскага бюджэту закупляць лекі, якія не ўваходзяць у рэспубліканскі фармуляр. Але толькі ў выпадку даказанай эфектыўнасці прэпаратаў. Рашэнне аб закупцы будзе прымаць кансіліум. Таксама беларусы на бюджэтнай аснове змогуць адпраўляць біяматэрыялы для дыягностыкі за мяжу. Гэтую працэдуру правядуць у выпадку, калі спецыфічныя даследаванні даступны толькі за межамі нашай краіны.

Акрамя таго, права праводзіць медагляды працуючых людзей атрымалі медсанчасткі і клінікі, якія маюць ведамасную прыналежнасць да прадпрыемстваў і арганізацый. Гэта дасць магчымасць павялічыць даступнасць дапамогі і верагоднасць выяўлення захворванняў на ранняй стадыі.

Цяпер кантроль за якасцю медвырабаў і выдача адпаведных заключэнняў замацаваны за Дзяржфармнаглядам. Новаўвядзенні закранулі і постдыпломную падрыхтоўку, да ўдасканалення якой заахвоціла выкарыстанне высокіх тэхналогій у рэгіёнах і развіццё міжраённых цэнтраў. Па-першае, будуць створаны ўніверсітэцкія клінікі для эфектыўнага ўзаемадзеяння прафесарска-выкладчыцкага складу і ўрачоў. Таксама новаўвядзенні закранулі клінічную ардынатуру. Асноўная задача - падрыхтаваць спецыялістаў да аказання высокатэхналагічнай дапамогі, падкрэсліла начальнік галоўнага ўпраўлення арганізацыйна-кадравай работы і прафесійнай адукацыі Міністэрства аховы здароўя Вольга Калюпанава:

- Павялічылі колькасць напрамкаў, па якіх можна прайсці ардынатуру. Калі раней іх было 63, то зараз - 67. Рыхтаваць будзем спецыялістаў у галіне дзіцячай анкалогіі, неўралогіі і псіхіятрыі. Навучанне засталося вочным і завочным, але завочная форма толькі для тэрапеўтычных спецыяльнасцей. Айчынная клінардынатура запатрабавана замежнікамі. З улікам іх пажаданняў стварылі інтэграваныя праграмы: частка падрыхтоўкі пройдзе ў Беларусі, а частка - у іх роднай краіне.

Раней у клінардынатуру маглі паступаць лекары, якія адпрацавалі не менш за два гады па спецыяльнасці. Цяпер наймальнік мае права накіраваць спецыяліста на навучанне ў любы час. Тэрмін адпрацоўкі пасля вочнай і завочнай формы -пяць гадоў.

СБ