Шырокі ўдзел грамадзян у дыялогавых пляцоўках аб’ядноўвае грамадства – дэпутат Вольга Петрашова

Удасканаленне Канстытуцыі служыць магутным інструментам аб’яднання і кансалідацыі розных сацыяльных класаў і грамадства ў цэлым. На гэтым зрабіла акцэнт намеснік старшыні Пастаяннай камісіі па міжнародных справах Палаты прадстаўнікоў Вольга Петрашова падчас дыялогавай пляцоўкі па абмеркаванні змяненняў у Канстытуцыю, якая прайшла сёння ў мінскім філіяле Беларускага гандлёва-эканамічнага ўніверсітэта спажывецкай кааперацыі.

«Я, як парламентарый, уносіла папраўкі ў некаторыя законапраекты, якія сёння працуюць на карысць людзей. Але цяпер перад грамадствам стаіць яшчэ больш сур’ёзная задача – унясенне змяненняў у Канстытуцыю. Гэта тэма настолькі запатрабавана ў грамадстве, што дыялогавыя пляцоўкі хоць і праходзяць доўгі час, але ўсё яшчэ застаюцца актуальнымі. Не дзіўна, бо ў абмеркаванні асноўнага закона дзяржавы могуць удзельнічаць розныя катэгорыі грамадзян. І мы трапятліва ставімся да ўсіх іх прапаноў, бо дыялог – гэта адзіны шлях да нацыянальнай згоды», – заўважыла Вольга Петрашова.

Таксама дэпутат адзначыла, што парламентарыі штодня атрымліваюць дзясяткі наватарскіх і карысных прапаноў па змене некаторых пунктаў Канстытуцыі.

«Гэта гаворыць пра тое, што прапанаваны уладай фармат дыскусіі цікавы грамадскасці. І нават калі прапановы не датычацца асноўнага закона дзяржавы, але кранаюць сваёй каштоўнасцю, яны абавязкова фіксуюцца і ў далейшым могуць быць выкарыстаны ў іншых законапраектах», – падкрэсліла Вольга Петрашова.

Асобна згадалі і пляцоўку, якая сёння аб’яднала членаў дыскусіі. Яна была абрана невыпадкова, бо супрацоўнікі адміністрацыі навучальнай установы, педагагічны калектыў і навучэнцы інакш глядзяць на шэраг важных пытанняў, і іх меркаванне неабходна чуць, разглядаць і даносіць якасныя прапановы ў парламент.

Так, на дыялогавай пляцоўцы разгарнулася актыўнае абмеркаванне абсалютна розных пытанняў, але асаблівы акцэнт быў зроблены на тэмах, якія датычацца сферы адукацыі. Гэта аб’яднанне цэнтралізаванага тэставання і выпускнога экзамену, неабходнасць увядзення практычнай арыентаванасці ва ўстановах адукацыі, падтрымка ініцыятыў і праектаў моладзі.

Усе канструктыўныя прапановы, якія прагучалі ў ходзе дыскусіі па гэтых пытаннях, будуць прааналізаваны і адпраўленыя ў адпаведную камісію парламента.

БЕЛТА