Спецыяльную прэмію за дасягненні ў сацыяльнай сферы ўручылі ў Магілёве

Спецыяльную прэмію Магілёўскага аблвыканкама за дасягненні ў сацыяльнай сферы па выніках 2019 года ўручылі сёння ў Магілёве. Уладальнікамі высокай узнагароды стала 49 прадстаўнікоў розных прафесій, сярод якіх дзеячы культуры, педагогі, медыцынскія работнікі, журналісты і спартсмены.

За дасягненні ў галіне сацыяльна-палітычнай дзейнасці спецыяльную ўзнагароду атрымала курсант Магілёўскага інстытута МУС Іна Клячан. У мінулым годзе дзяўчына выйграла абласны этап конкурсу «Студэнт года» і прадстаўляла рэгіён на рэспубліканскім узроўні. «Калі я даведалася, што стала адной з самых маладых уладальніц сацыяльнай прэміі, то адчула вялікую адказнасць. Гэта вялікі гонар – прадстаўляць тут не толькі сябе, але і свой інстытут. Такія важныя мерапрыемствы і высокая ацэнка маіх заслуг не проста ідуць у нейкую асабістую скарбонку перамог. Яны становяцца дадатковым матыватарам, каб далей развівацца і працаваць на карысць нашай вобласці і ўсёй рэспублікі», – сказала Іна Клячан.

Настаўнік геаграфіі Межысецкай сярэдняй школы Андрэй Трэй упэўнены, што атрыманне прэміі аблвыканкама залежыць ад упартай і якаснай працы на працягу ўсёй прафесійнай дзейнасці. «Стаць лаўрэатам прэміі аблвыканкама – гэта вынік сістэматычнай, якаснай і ўпартай працы ў падрыхтоўцы і навучанні дзяцей. У маёй асобе вылучылі працу ўсяго Магілёўскага раёна – наш уклад у развіццё вобласці не застаўся незаўважаным. Сёння тут сабралі найлепшых з найлепшых сярод моладзі ўсёй Магілёўскай вобласці. І мне прыемна быць адным з іх», – падзяліўся ўладальнік прэміі ў галіне адукацыі.

Рэдактар аддзела вытворчасці тэлевізійных праграм «Тэлерадыёкампаніі “Магілёў”» Алена Іванова лічыць, што за асабістай перамогай стаіць увесь калектыў арганізацыі. «Калі ты робіш сваю працу, то менш за ўсё думаеш пра ўзнагароды. Ты проста стараешся рабіць якасныя і цікавыя праграмы, якія будуць карысныя гледачам. Атрыманне прэміі аблвыканкама – своеасаблівая зваротная сувязь, якая яшчэ раз даказвае, што наша праца прыносіць карысць грамадству. І гэта заслуга ўсяго калектыву Магілёўскай тэлерадыёкампаніі, таму што ў стварэнні любой праграмы або перадачы задзейнічана шмат людзей, якія часта застаюцца па-за кадрам. Прафесіяналы, якія заўсёды гатовыя прыйсці на дапамогу не толькі словам, але і справай. Праца на тэлебачанні – гэта праца ў камандзе, ад аднаго рэдактара мала што залежыць. І мая перамога сёння – гэта поспех усёй нашай каманды», – сказала Алена Іванова.

У віншавальнай прамове намеснік старшыні Магілёўскага аблвыканкама Валерый Малашка адзначыў, што Магілёўская вобласць багатая на маладыя таленты, якімі ганарыцца не толькі рэгіён, але і ўся рэспубліка.

«Я заўсёды з нецярпеннем чакаю сацыяльнай прэміі аблвыканкама, таму што ў гэты дзень у адной зале збіраюцца некаторыя з самых лепшых прадстаўнікоў усіх сфер жыцця грамадства. І што самае важнае – тут мы ўшаноўваем таленавітую моладзь рэгіёна – хлопцаў і дзяўчат, якія яшчэ толькі пачынаюць свой шлях у абранай прафесійнай дзейнасці, і тых, хто ўжо паспеў зарэкамендаваць сябе адказным і граматным спецыялістам. Усе яны выраслі ў незалежнай Беларусі, і ў іх поспеху ёсць заслуга нашага грамадства – бацькоў, педагогаў, кіраўніцтва вобласці і граматнай палітыкі дзяржавы па падтрымцы юных талентаў. Я ўпэўнены, што кожны з іх адбудзецца ў жыцці і будзе далей працаваць на карысць нашага краю».

БЕЛТА