Спектакль «Сабачае сэрца» пермскага тэатра паказалі ў Магілёве

Адзін з самых любімых тэатраў магіляўчан - пермскі тэатр «Ля Моста» - падрыхтаваў гледачам сапраўдны падарунак у выглядзе класічнай пастаноўкі твора Міхаіла Булгакава «Сабачае сэрца», якую сёння, 18 лютага, паказалі ў Магілёўскім абласным драматычным тэатры.

Класічная версія спектакля - менавіта такі паўстаў твор Міхаіла Булгакава ў пастаноўцы рэжысёра тэатра «Ля Моста» Сяргея Фядотава. Спектаклі заснавальніка пермскага тэатра даўно палюбіліся магілёўскаму гледачу. Фядотаў у абласным цэнтры - часты госць. І вось чаму, тлумачыць сам рэжысёр:

- У Магілёве на гастролях мы ўжо шосты раз. Упершыню прыехалі сюды 15 гадоў таму і адразу палюбілі гэты горад, ваш надзвычайны тэатр. За 36 гадоў існавання «Ля Моста» мы пабывалі ў 50 краінах. І магу дакладна сказаць, што драмтэатр у Магілёве не саступае еўрапейскім. Вельмі рады, што мы зноў тут і паказваем два класічныя спектаклі – сёння «Сабачае сэрца», а 19 лютага – «Ідыёт». Цяпер мала дзе можна ўбачыць класічныя пастаноўкі, многія асучаснены, пераносяць час дзеяння ў нашы дні. Але класіка ёсць класіка, яе не трэба мадэрнізаваць.

Фядотаў дадаў, што нават да п'ес сучасных аўтараў іх тэатр імкнецца падыходзіць як да класічных:

- Мы стараемся вывучыць аўтара і краіну, у якой адбываецца дзеянне. Напрыклад, калі адкрылі для сябе Марціна Макдонаха, на рэпетыцыі ездзілі ў Ірландыю. Гэтак жа было і з грузінскімі спектаклямі - выязджалі ў Тбілісі. Мы былі ў Англіі, Арменіі, прасякнуліся духам і ў Беларусі, пасля гэтага ў нас з'явіўся спектакль «Камедыя» на беларускай мове.

Дарэчы, «У Моста» выступіць у гэтым сезоне на Міжнародным маладзёжным тэатральным форуме «М.@rt.кантакт» са спектаклем «Звер». Сёння ж гледачы ўбачылі «Сабачае сэрца». Містычная гісторыя, дзе «свяціла рускай медыцыны», прафесар Праабражэнскі, вырашаецца не проста на рызыкоўны вопыт - хоча прымерыць на сябе ролю Творцы, паўтарыўшы вялікае таінства стварэння чалавека. Вопыт ператварэння сабакі ў чалавека абарочваецца трагікамічным фарсам.

А 19 лютага гледачоў чакае «Ідыёт» Фёдара Дастаеўскага.

СБ