Рус Бел Eng 中文

Старшыня Ходасаўскага сельвыканкама Анатоль Пруднікаў: эфектыўнасць самакіравання ў руках сельскіх дэпутатаў

Сярод тых, хто прадставіць Магілёўскую вобласць на Усебеларускім народным сходзе, будзе і мсціслаўская дэлегацыя. У яе ўваходзіць старшыня Ходасаўскага сельвыканкама Анатоль Пруднікаў. Яго добра ведаюць і паважаюць не толькі ў Ходасах і прылеглых вёсках, але і ў раёне. Пад яго кіраўніцтвам сельсавет тры гады запар уваходзіў у спіс найлепшых і не здае гэтыя пазіцыі і сёння.

Карэспандэнтдаведалася, што ён хацеў бы абмеркаваць на народным вечы.

– Анатоль Юревіч, Вы ўпершыню абраны дэлегатам. Якія адчувалі эмоцыі, даведаўшыся пра гэта?

– Адчуў вялікую адказнасць. Пабываць на Усебеларускім народным сходзе –гэта значыць сустрэць аднадумцаў, людзей, якія неабыякавыя да лёсу Беларусі і яе развіцця. Усе мы хочам змяніць наша жыццё да лепшага. І толькі наш беларускі народ можа гэта зрабіць сумеснымі намаганнямі і мірным шляхам, бо працавітасць закладзена ў нас на генетычным узроўні.

Праблемы, якія будуць падымацца на народным форуме, абмяркоўваюць ужо не першы месяц. Што хвалюе асабіста Вас і Вашых калег?

– Паколькі я сельскі жыхар, мяне хвалюе будучыня беларускай вёскі, эфектыўнасць працы органаў мясцовага самакіравання, падтрымка і развіццё асабістых падсобных і сялянска-фермерскіх гаспадарак, добраўпарадкаванне тэрыторыі, прывабліванне інвестыцый. На дыялогавых пляцоўках абмяркоўвалася значэнне працы сельскіх дэпутатаў і прадстаўнікоў органаў тэрытарыяльнага грамадскага самакіравання. Асабіста для мяне гэтыя людзі –сапраўдная падтрымка і апора. Немагчыма быць у курсе ўсіх праблем у сельсавеце. Але штодзённая сувязь са старастамі і актыўная праца дэпутатаў з насельніцтвам дазваляе аператыўна вырашаць пытанні. На мой погляд, важна ствараць, пашыраць магчымасці для мясцовага самакіравання, граматна пераразмяркоўваць іх паўнамоцтвы і фінансава стымуляваць, падтрымліваць грамадзянскую ініцыятыву, мець магчымасць самім размяркоўваць свой бюджэт.

– Што змянілася ў Ходасаўскім сельсавеце за мінулыя пяць гадоў?

– Мы імкнуліся надаваць увагу кожнай сферы. За гэтыя гады адкрылася пяць сялянска-фермерскіх гаспадарак, прываблена 15 тысяч долараў інвестыцый, свае гранты для развіцця атрымалі нашы прадпрымальнікі, якія і цяпер паспяхова развіваюць сваю справу. За гэты перыяд істотна змянілася і дэмаграфічная сітуацыя. У мінулым годзе ў Ходасаўскім дзіцячым садзе адкрылася дадатковая група. У верасні за парты сядзе 25 першакласнікаў. Сёння аграгарадок інтэнсіўна развіваецца. Тут створана зручная інфраструктура: амбулаторыя з сучасным абсталяваннем, сельскі дом культуры, дзіцячая школа мастацтваў, добра пастаўлена праца як кааператыўнага, так і прыватнага гандлю. Вялікую працу мы правялі па добраўпарадкаванні тэрыторыі, былі адкрыты спартыўныя і дзіцячыя пляцоўкі, парк Дружбы, пабудаваны станцыі абезжалезвання вады, рамантуюцца праблемныя ўчасткі дарог. У бягучым годзе новы асфальт будзе пакладзены на некалькіх вуліцах аграгарадка. Для вырашэння праблем жыхары вёсак могуць звярнуцца ў сельвыканкам і пазваніць на прамыя тэлефонныя лініі, наведаць выязныя прыёмы, якія рэгулярна праводзяцца кіраўніцтвам раёна і кіраўнікамі арганізацый і службаў.

– Якое пытанне Вы б абмеркавалі з іншымі дэлегатамі на народным форуме?

– Хацеў бы абмеркаваць змены, якія наспелі ў сістэме органаў мясцовага самакіравання і пагаварыць пра тое, што сёння трэба сельскім жыхарам. Нам важна чуць людзей, прымаць іх ініцыятывы, стымуляваць іх удзел у жыцці вёскі, пазбавіць ад бюракратызацыі сістэмы, калі яны прыйшлі да нас са сваім важным для жыцця населенага пункта сацыяльным праектам. Лічу, у будучыні трэба спрасціць і ўзмацніць зваротную сувязь з грамадзянскай супольнасцю і мясцовым самакіраваннем.

mstlife.by

Пры выкарыстанні матэрыялаў актыўная гіперспасылка на mogilev-region.gov.by абавязковая