Старшыня Магілёўскага аблвыканкама Леанід Заяц правёў прамую тэлефонную лінію

Праблемы працаўладкавання, вырашэнне камунальных пытанняў, транспарт у аддаленыя вёскі, добраўпарадкаванне тэрыторый – пра ўсё гэта гаварылі сёння жыхары Магілёўскай вобласці кіраўніку рэгіёна.

Віктар Куцапелаў, які жыве ў раёне станцыі Буйнічы, што ў Магілёўскім раёне, паскардзіўся на перабоі з гарачай вадой. Маўляў, у пад’ездзе, у якім знаходзіцца яго кватэра, жыхары ўжо пачынаюць забываць, што такое гарачае водазабеспячэнне. Куды толькі ні звярталіся, але толку пакуль няма. Пытанне было ўзята на кантроль. А адразу пасля званка старшыня Магілёўскага райвыканкама Алег Чыкіда паведаміў, што брыгада раённага «Жылкамгаса» працуе на месцы, каб аператыўна вырашыць праблему.

Магіляўчанка Марына Раманава гаварыла аб тым, што ў двары яе дома пачалося добраўпарадкаванне – зроблена вялікая паркоўка. Быццам бы выдатна. Але знік гаспадарчы куток, дзе раней можна было вывесіць сушыцца бялізну. Аказалася, што работы толькі пачаліся. І прыстасаванні для гаспадарчых патрэб зніклі не канчаткова. У найбліжэйшы час яны з’явяцца зноў.

Кіраўнік фермерскай гаспадаркі «Васілёк» з Дрыбінскага раёна Васіль Ігнаценка наракаў на тое, што камбінаты хлебапрадуктаў – як Магілёўскі, так і Бабруйскі – не разлічыліся з ім за здадзенае зерне. Прычым ёсць доўг і за 2018 год. Да Новага года запазычанасць будзе пагашаная.

Усяго на «прамую лінію» звярнуліся 23 чалавекі. Узнятыя імі пытанні ўзяты на кантроль.

Павел Мінчанка, фото – Андрэй Сазонаў, СБ