Старшыня Магілёўскага аблвыканкама Леанід Заяц сустрэўся з выкладчыкамі і студэнцкім актывам ВНУ рэгіёна

Старшыня Магілёўскага аблвыканкама Леанід Заяц сёння сустрэўся з прафесарска-выкладчыцкім складам і студэнцкім актывам ВНУ рэгіёна. Палілог адбыўся на пляцоўцы МДУ імя А. А. Куляшова.

У мерапрыемстве таксама прымалі ўдзел намеснік старшыні Валерый Малашка, старшыня Пастаяннай камісіі па адукацыі, культуры і навуцы Палаты прадстаўнікоў Ігар Марзалюк, прарэктар па вучэбнай рабоце Магілёўскага ўніверсітэта імя А. А. Куляшова, член Савета Рэспублікі Алег Дзячэнка.

Напярэдадні завяршэння года прынята падводзіць вынікі. Леанід Заяц агучыў асноўныя напрамкі развіцця вобласці і краіны, расказаў аб дасягнутых рэгіёнам выніках. І хоць 2020-ы быў складаным (пандэмія COVID-19 ахапіла ўсе краіны і кантыненты), Беларусь выстаяла. «Прадуманая палітыка дзяржавы не дазволіла загубіць эканоміку, распусціць працоўныя калектывы, захавала стабільнасць і дынаміку развіцця народна-гаспадарчага комплексу», – падкрэсліў старшыня Магілёўскага аблвыканкама. Пры гэтым наш рэгіён прадэманстраваў рост па некаторых кірунках. Асабліва адчувальным ён быў у сельскай гаспадарцы. Павялічаны аб’ёмы вытворчасці збожжа (на 40%), рапсу, цукровых буракоў, малака, нарыхтавана больш кармоў для грамадскай жывёлагадоўлі. Нядрэнна спрацаваў і прамысловы сектар, забяспечыўшы ўсім неабходным унутраны рынак. Памацнеў будаўнічы комплекс. У рэгіёне ўзвялі аб’ектаў больш, чым планавалі, пры гэтым каля 1,5 тыс. шматдзетных сем’яў атрымала ў гэтым годзе камфортнае жыллё. Былі адкрыты новыя басейны, дзіцячыя сады, стадыёны, паліклінікі і бальніцы. Пабудавана нямала дарог. Забяспечана праграма «Чыстая вада», газіфікаваны пасёлкі, палепшаны стан гарадоў – Бялынічаў, Асіповічаў, Слаўгарада і інш. У цэлым вобласць па выніках года павінна дадаць 1% да ўзроўню ВРП 2019-га. «Усё гэта гаворыць аб правільнасці тактыкі і стратэгіі, якую абрала краіна ў няпросты час, – падсумаваў Леанід Заяц. – Гэты год быў павучальным. Мы прааналізавалі яго і зрабілі высновы, каб зрабіць правільныя крокі ў будучым».

У кожнага з прысутных на сустрэчы была магчымасць задаць пытанні і выказацца. Хлопцаў і дзяўчат цікавілі перамены, якія чакаюць рэгіён у 2021 годзе, прафесіі спецыялістаў, запатрабаваных сёння ў вобласці, а таксама працэс правядзення ў краіне вакцынацыі ад COVID-19.

Леанід Заяц у першую чаргу звярнуў увагу на тое, што ў будучым годзе асаблівую ўвагу нададуць дапрацоўкам у сістэме аховы здароўя. У Магілёве працягнуць будаўніцтва неабходнага рэгіёну кардыяхірургічнага корпуса абласной бальніцы. Пачнуць узвядзенне інфекцыйнай бальніцы. Плануецца істотна паправіць справы ва ўстановах аховы здароўя, пабудаваных яшчэ ў савецкі час. У Бабруйску і Асіповічах з’явяцца новыя школы, у іншых гарадах вобласці – басейны і стадыёны. Што тычыцца кадраў, у рэгіёне адчуваецца недахоп інжынераў, урачоў, спецыялістаў сельскай гаспадаркі. Заўсёды запатрабаваныя прадстаўнікі рабочых прафесій.

У сваю чаргу, рэктар Магілёўскага дзяржаўнага універсітэта імя А. А. Куляшова Дзяніс Дук адзначыў: сітуацыя з пандэміяй паспрыяла перагляду падыходаў да сістэмы выкладання, больш хуткаму ўкараненню інавацый, у тым ліку дыстанцыйнай адукацыі. Дзякуючы гэтаму захаваўся экспарт паслуг, і студэнты з усяго свету могуць не менш якасна атрымліваць веды ў Магілёўскай ВНУ.

Падчас сустрэчы шмат гаварылася аб экстрэмізме і нацызме. Пра гісторыю іх узнікнення і барацьбу з праявамі ў сучасным грамадстве расказаў Ігар Марзалюк.

Вольга Емельянава, фота Галіны Гаўрыловіч